Eventoj n-ro 178, retposxta versio ********************************** Titolpagxe: - Rilatoj inter UEA kaj la "Civito" - intervjuo kun O. Buller Faka aplikado: - "Faklingvajxoj en Esperanto" - Elektrotekniko - Festivalo de E-lingvaj videofilmoj en Slovakio Kontakto sercxata: - Inventista klubo sercxas kunlaborantojn, inventistojn Interreto: - MP3-dosieroj cxe la retpagxoj de Rok-gazet` - Euxropa Bulteno - du gazetoj en unu - Statistiko pri la plej ofte uzataj literoj en Esperanto Arangxoj: - Euxropunia Esperanto-Kongreso - Aroma Jalta renkontigxo - 3 arabaj renkontigxoj tuj antaux UK - Junulara Tago en Romo - ankaux por Esperantistoj - Kompleta monata kalendaro Movado: - Aagado per "pozitivaj novajxoj" - Kongreso de Cxeha Esperanto-Asocio - Konsultejo de Akademio de Esperanto - Plibonigxo cxe Hispana E-Federacio - Okazajxoj de la Zamenhof-tago en Kroatio - Okcidenteuxropa Kunlaboro de E-Junularoj - Esperanto-klubo de Vasteras pli kaj pli vigle funkcias - Neformala raporto pri la "novembra kunveno" "Esperantologio, interlingvistiko kaj lingvopolitiko" Reagoj: - Kieal argumenti efike? Instruado, ILEI: - Nekuitma lernolibro - kun primovadaj informoj Konkursoj: EKRA-2000 - literatura konkurso Gazetoj: - Songazeto por blinduloj Radio: - Informoj pri la E-elsendoj de Radio Varsovio Kulturo: - Vocxoj de la Esperanto-historio en kvin kasedoj Muziko: - Dolcxa muziko el Kubo Rubrikoj: - mallonge (12), anoncetoj (4), korespondi deziras (3) Interese: - Nekutima varbilo por Esperanto - Germanoj suferas pro miksita lingvo - Kiel pasas la plej longa nokto en Irano? ************************************************************************** TITOLPAGxE ////////// Intervjuo kun Osmo Buller Pri la rilatoj inter UEA kaj la "Civito" ======================================== La t.n. "Esperanta Civito", kies patro estas Giorgio Silfer, lastatempe dissendis komunikojn pri la redaktado de la fondaj dokumentoj de tiu nova "establo". Cxiam pli levigxas la demando, cxu temas pri nova rivalo de UEA kaj kiel UEA vidas la Civiton. Ni demandis pri tio la gxeneralan direktoron de UEA, Osmo Buller. EVENTOJ: Kiel oni povus klasifiki la Civiton inter la E-organizajxoj? Kvankam gxi prezentas sin tre pompe, gxi esence estas plia faka asocio, FA. EVE: Cxu gxi povus formale ekrilati kun UEA kiel aliaj fakaj asocioj? Kompreneble. Se gxi havas almenaux 25 membrojn, gxi rajtas peti akcepton kiel kunlaboranta FA. Se gxi montrigxos vivipova, gxi povos post iom da tempo peti la statuson de aligxinta FA. Kutime la Komitato atendas minimume tri jarojn, antaux ol gxi pretas promocii kunlaborantan FA al aligxinta FA. EVE: Cxu kiu ajn asocio povas aligxi al UEA? Cxar UEA estas politike kaj religie neuxtrala, ankaux la aligxintaj asocioj devas esti neuxtralaj. Se la Civito volus aligxi al UEA, la Komitato unue prijugxus surbaze de gxiaj oficialaj dokumentoj, cxu gxi estas neuxtrala. EVE: Kial do ekz. la asocioj de katolikoj kaj komunistoj povas esti en oficialaj rilatoj kun UEA, kvankam ili evidente estas ne-neuxtralaj? Gxuste pro sia ne-neuxtraleco ili ne estas aligxintaj fakaj asocioj sed kunlaborantaj. Kunlaboran kontrakton UEA povas fari kun kiu ajn asocio. EVE: Cxu ankaux kun SAT? Kompreneble. Tia kontrakto neniel tusxas aux limigas la sendependecon kaj identecon de la partneroj. EVE: Cxu post eventuala oficialigo de sia rilato kun UEA la Civito povos eniri ankaux la decidostrukturon de UEA? Jes en la kazo, ke gxi iam farigxus aligxinta FA. Tiam gxi rajtus nomumi unu plenrajtan membron en la Komitato de UEA, t.n. komitatanon A. EVE: Cxu tiam Giorgio Silfer povus farigxi komitatano kaj ecx estrarano de UEA, kvankam li mem ne estas membro de UEA? La Civito mem elektus sian komitatanon A inter tiuj siaj membroj, kiuj estas individuaj membroj de UEA. Tiu povus kompreneble kandidatigxi ankaux por membreco en la Estraro de UEA. EVE: Cxu vi kredas, ke la Civito pretas peti oficialajn rilatojn kun UEA? Gxi almenaux asertas, ke gxi ne estas celita kontraux UEA. Peti kunlaboran kontrakton kun UEA estus bona maniero pruvi tion. Tamen, se mi povas bone orientigxi en la komunikoj de la Civito, gxi ankoraux ne estas formale fondita. Ni unue vidu, cxu tio okazos. La partopreno en gxiadua kunsido ja estis multe pli modesta ol en la unua, kaj ERA, la originala kunvokinto apud LF-Koop, jam pli frue lauxte forlasis la projekton. EVE: Cxu la Civito estas bonvena en la Strategia Forumo de la Esperanto- Komunumo sendepende de sia rilato kun UEA? La Strategia Forumo estas sendependa de UEA. Ekde la komenco gxi havas multajn aligxintojn, i.a. SAT, kun kiuj UEA ne havas formalajn rilatojn. UEA iniciatis gxian kunvokon kadre de Kampanjo 2000, cxar kiel la plej granda E-organizajxo gxi sentas apartan respondecon pri la farto de nia komunumo. Gxis nun UEA ja zorgas pri la teknika organizado de la Forumo, sed tion gxi faras nur, cxar aliaj forumanoj opiniis, ke tio superas iliajn eblojn. Kiel forumano UEA tamen estas unu inter aliaj. La Civito certe bonvenas tie. EVE: Cxu vi pretus mem farigxi "civitano"? Ne. Mi trovas stranga la strebon, kontrauxan al la fluo de universalisma movado kiel la nia, apartigi sin en ia fikcia landeto, kiom ajn translima, diaspora kaj tutmondeca gxi estu. Tio krome povus nur konfuzi eksterulojn pri la efektivaj celoj kaj motivoj de esperantistoj, kaj kreskigi la sxancojn ke Esperanto sxajnas io sekteca kaj ridinda. EVE: Cxu eblas vidi tion ankaux kiel starpunkton de UEA? Eviti sektecon kaj ridindigon de Esperanto kompreneble estas oficiala linio de UEA, sed konkrete pri la Civito UEA ne bezonis ankoraux esprimigxi. EVE: Fine alia demando pri via propra opinio. Pro via ofico vi estas bone informita pri nia movado tra la mondo. Kion vi nomus la Ago de la Jaro 1999? Plej bone ja estus atendi 10 jarojn por vidi, kio estis grava kaj vivipova. Tamen, por mi la Ago de 1999 estis la projekto "Indigxenaj Dialogoj", kiun iniciatis Bessie Schadee kaj Sylvain Lelarge. Gxi estas vere io unika kaj novspeca kaj meritas apogon de ni cxiuj. EVE: Dankon pro la intervjuo! ************************************************************************** Renovigu vian abonon al Eventoj! ================================ Kiel vi spertas, - laux nia promeso - lastatempe vi ricevas Eventojn jam en normala ritmo. Ni petas vin renovigi vian abonon por la jaro 2000. La abonkotizoj estas nesxangxitaj, por hungaroj iom kreskis al 3950 Ft. Ni volas atentigi vin pri la eblo aboni al la retposxta novajxservo "RET- INFO", kiu - inter multaj aliaj informoj - inkluzivas ankaux la tekston de Eventoj - nur kostas multe malpli... - Dankojn pro via reabono! ************************************************************************** FAKA APLIKADO ///////////// Faklingvajxoj en Esperanto ========================== De Eventoj n-ro 176 ni dauxre aperigas fakliteraturon Esperantlingvan pri diversaj sciencoj. Jen la sekva parto: - parto 3. - ELEKTROTEKNIKO -------------- - DIAZ, Amador: Vento produktas elektron. = revuo Monato 1988:7 p. 24. - EICHHOLZ, Rudiger: Esperanta bildvortaro. Bailieboro, Ont., 1988. ISBN 0-919186-32-7. - Duden: Elektristo, Elektro-centralo. pp 224-225, 266-269 - Kasigai: Esperanta terminaro de fiziko. Esperanto-japana-angla. Department of Physics, Chubu University, 1987. 200 p. ISBN 4-9900082-0-0 - GABOR Laszlo: Hungara-Esperanta fortkurenta vortaro (manuskripto cxe Eventoj, 1675 Budapest pk. 87.) - HRYNKIEWICZ, Adan, ERGOTO: Lauxtema vortaro Esperanto-angla-franca- hispana. Buenos Aires, 1972. pp 162-163 (eletro) - KAPITANY Lajos: Konciza terminaro kaj esprimaro por radioamatora lingvoekzameno. MESZ, 1980. 18 p. - KAT, Jan Otto de: Magnete sxvebanta inerci-rado por elektro-mekanika energikonservado = revuo Sciencaj Komunikajxoj 1985: mart.1 - SARKOZI, Janos: Modernaj elektraj lumigiloj. = revuo "Apliko de Esperanto en la Scienco kaj Tekniko" 1981:84 - SARKOZI, Janos: Pri la vakuotekniko. = revuo Sciencaj Komunikajxoj 1985:mar 19 - Seminario pri energio - la tutmonda problemo. Red. V. Novobilsky kaj Z.Pluhar. Praha, Scienc-teknika sekcio, STS de CxEA, 1982. 94 p. (Apliko de Esperanto en scienco kaj tekniko. 1982.) - SZILVASI, Laszlo (red.): Radioteknika artikolaro. Budapesxto: Scienca EldonCentro de UEA, 1984. 64 p. ISBN 963 571 116 1 - 23 artikoloj pri tre diversaj radioteknikaj temoj, kun 600 vorta 4-lingva vortaro (Esperanta, angla, hungara, rusa) - E. Wuster: Elektrotechnische Ausdrucke in Esperanto. 1923. Internacia Elektroteknika Komisiono (IEC). Germana-Esperanto - TAAKAGI, Ooki: Elektroteknika Vortaro. 1933. Internacia Elektroteknika Komisiono, IEC, angla-Esperanta-japana - International Electrotechnical Vocabulary. Fundamental Difinitions, 1935. Internacia Elektroteknika Komisiono (IEC). Franca-angla-germana-itala- hispana-Esperanta - Mejxdunarodnij Elektroteknicxeskij Slovar'. 1936. Internacia Elektroteknika Komisiono (IEC). Franca-rusa-angla-germana-itala-hispana- Esperanta - International Electrotechnical Vocabulary, 1938. Internacia Elektroteknika Komisiono (IEC). Franca-angla-germana-itala-hispana-Esperanta. - Vocabulario EIectrotecnico Internacional, 1939. Internacia Elektroteknika Komisiono (IEC). Hispana-franca-angla-germana-itala-Esperanta. Pluaj fakverkajxoj troveblos ankaux en la kategorio fiziko, vidu sekvajn numerojn de Eventoj - ndlr. ************************************************************************** Esperanta Filmfestivalo ======================= La 1-a Esperanta Filmfestivalo okazis la 9-an de oktobro 1999 kun partoprenantoj el Slovakio, Pollando, Brazilio kaj Kubo. EFIFO 99 komencis per saluto de prezidanto de Okcidentslovakia Esperanta Societo. Inter la gastoj estis cxefoficuloj de slovaka filmcentro, kiuj multe okupigxis pri la valoro de la arangxo kaj de Esperanto. Ili ankaux promesis la helpon dum antauxpreparoj de la EFIFO 2000, kiu okazos 25-an de novembro 2000. La filmfestivalo komencigxis per prezento de pola filmdokumento "Esperanto", cxar la EFIFO estis dedicxita al la 140-a datreveno de naskigxo de Dr. Zamenhof. Poste cxeestantoj rigardis la reklamfilmon pri Slovakio, dublitan en Esperanto. Posttagmeze sekvis la unua prezentado de slovakia filmo en Esperanto, "Rememoroj", kiu temas pri Esperantistaj arangxoj en Slovakio kaj najbaraj landoj inter 1995 kaj 1998. La filmfestivalo finigxis per la prezentado de svisa filmo "Muzikskatoloj". Post la fino de filmprezentadoj okazis ankoraux la koncerto de kubdevena kantistino Elizabeth Diaz, kiu kantis en Esperanto. Tri tagojn antaux la arangxo okazis gazetarkonferenco pri Esperanto kaj gxia auxtoro D-ro Zamenhof kaj pri la 1-a EFIFO, kiun partoprenis redaktoroj de tutlanda gazeto, "Narodna Obroda", tutslovakia gazetara agentejo, "TASR" kaj du filmkritikistoj. Pauxlo Kastak Rete: esperant@forigu.isternet.sk ************************************************************************** KONTAKTO SERCxATA ///////////////// Inventista Klubo sercxas kunlaborantojn ======================================= Kvankam la Inventista Klubo havas nuntempe nur kelkajn aktivajn membrojn kaj agentojn, la rezultoj estas mirindaj. Sed ankoraux pli mirindaj estas la ebloj kaj la planoj de la klubo. Pro tio la klubo sercxas novajn interesigxantojn pri la kunlaboro. Bonvenaj estas novaj inventistoj kaj klubaj agentoj, kiuj perus la kontakton inter la klubo kaj la enlandaj inventistoj (tiuj povas esti ankaux ne-esperantistoj) - aux inter la auxtoroj kaj interesigxantoj pri la komerca eluzo de la inventoj. La agentoj ne devas esti patentaj specialistoj: pli gravas la komerca talento, spertoj, aktiveco, inventemo kaj kreemo. Por eviti miskomprenojn estas tamen postulata deca lingvoscio de Esperanto. La agentoj do reprezentas la interesojn de la Inventista Klubo kaj de gxiaj autuxroj- inventistoj sur la teritorio de sia lando, sercxas novajn malkovrojn kaj inventojn, registras ilin pere de la klubo kaj proponas por la komerca eluzo en sia lando la jam registritajn inventojn el la arkivoj de la klubo. La organizo kaj ties agentoj plene respektas la auxtorrajtojn kaj peras la kontraktojn nur post interkonsento kun la auxtoro, tenante en diskreteco cxiujn detalojn pri la inventoj, auxtoroj kaj membroj. Prof. Bruno Dalla Pozza Box 607, CK, Saipan, MP-96950 Usono Rete: dobruno@forigu.itecnmi.com ************************************************************************** INTERRETO ///////// MP3 - dosierojn de Rok-gazet' ============================= Kiel novajara donaco, la reta eldono de Rok-gazet' proponas al gxiaj legantoj sep MP3-dosierojn (MP3 estas la plej ofte uzata formato por trannsporti muzikon en la reto), kun po unu kanto el la sep gxisnunaj diskoj de Kolekto 2000. La reta Rok-gazet' legablas cxe: http://www.sciuro.demon.co.uk/rokgazet/ . Sercxu cxi tie la dosierojn. Duncan Thomson Rete: thom-ci0@forigu.wpmail.paisley.ac.uk ************************************************************************** Du gazetoj en unu ================= Aperis la 2-a numero de la Euxropa bulteno, destinita por informado kaj debato pri la agado en EU. La senpaga bulteno jam havas 42 "abonantojn". Tiu cxi retbulteno konsistas el du partoj: unu estas informilo pri Euxropa Esperanto-Unio (EEU-informilo) kaj pri la euxropa agado de la Esperanto- movado gxenerale; la dua estas libera forumo pri temoj ligitaj al la procezo de euxropa unuigxo kaj al ties rilato kun la celoj de la Esperanto-movado (Euxropa debato). Kiu deziras ricevi la revuon, tiu sin anoncu al mia ret-adreso: Umberto Broccatelli Rete: u.broccatelli@forigu.tiscalinet.it ************************************************************************** Kataluna retpagxo ================= La kataluna sekcio de Internacia Ligo de Esperanto-Instruistoj (ILEI) kreis sian retpagxaron. En la pagxoj trovigxas informoj pri E-o, UEA kaj ILEI kaj pri Katalunio. Eblas partopreni lingvokurson pri Esperanto en la kataluna. La adreso de la retpagxo estas: http://www.xtec.es/pxmarti10/ilei-cat.htm ************************************************************************** Statistiko pri literoj ====================== Detala statistika analizo pri la ofteco de la alfabetaj literoj en Esperantaj tekstoj haveblas en la formato WinWord 6.0, mi povas sendi gxin retposxte. Otto Haszpra Rete: haot@forigu.freemail.hu ************************************************************************** ARANGxOJ //////// Euxropunia Esperanto-Kongreso ============================= La 4-a Euxropunia Esperanto Kongreso okazos inter la 27-a de aprilo kaj 1-a de majo en la cxemara belga urbo Ostende. La temo de la arangxo estas: "Ekologio, sxlosilo por la tria jarmilo". La partoprenantojn atendas diversaj interesaj prelegoj rilate al la cxefa temo kaj al la maro. Okazos ekskurso al Bruselo, kie eblos viziti la sidejon de Euxropa Parlamento. Dum la kongreso okazos la jara cxefrenkontigxo de GEA (Germana Esperanto-Asocio). Pliaj informoj kaj aligxo cxe: Reinhard Pfluger Deutschhernufer 45, DE-60594 Frankfurt/Main, Germanio. ************************************************************************** Aroma Jalto 2000 ================ Inter 01-09 de majo okazos la 11-a Aroma Jalto Renkontigxo en Jalto, unu el la plej belaj urboj de Krimeo. Dum la arangxo okazos diversgradaj E- kursoj, sxakturniro, humuraj kaj intelektaj ludoj. Regos bona, malkrokodila etoso. Aligxo kaj pliaj informoj cxe: Vladimir Hordijenko pk. 35, UA-252133 Kievo-133, Ukrainio Rete: ukrea@forigu.esperanto.nu ************************************************************************** Arabaj arangxoj kaj UK ====================== Inter 22-25. 07. 2000. okazos antauxkongreso en Jordanio. La arangxo konsistas el tri sendependaj sed kunligitaj eroj: - Tradicia antauxkongreso, tio signifas karavanecan kunvojagxon al la UK kaj diversajn bonetosajn programerojn; - Renkontigxo por arabaj esperantistoj en Amano, al kiu aligxos la antauxkongresanoj. Tio estas grava afero, cxar de jardekoj cxi arangxo estas la unua oficiala araba renkontigxo; - Okazos seminario kun la cxefa temo: "Tutmondigxo kaj la arabaj landoj". Prelegos famaj arabaj esperantistoj; Eblas aligxi al unu el la tri eroj kaj ricevi la definitivajn detalojn. Pliaj informoj kaj kontaktadreso: Renato Corsetti Colle Rasto, IT-00036 Palestrina, Italio Rete: corsetti@forigu.itelcad.it ************************************************************************** Junulara Monda Tago 2000 ankaux Esperante ========================================= Katolikaj esperantistoj arangxis Esperantistan Grupon, malfermitan al cxiuj gejunuloj, kiuj deziras travivi la Junularan Mondan Tagon. La grupo estas malferma ne nur al katolikoj, sed al cxiuj, kiuj deziras koni kaj sperti la etoson de tiaj arangxoj. Unu el la celoj de la grupo estas cxeestigi kaj montri la funkciadon de Esperanto kadre de plureg-lingva kunveno. La arangxo okazos inter 10-14. 08. en Venecio, inter 15-20. 08. en Romo. En Venecio la partoprenantoj logxos cxe familioj, kaj estos akceptataj fare de volontuloj. Oni vizitos Venecion, cxu laux arta kaj kultura flanko, cxu laux spirita flanko. Okazos liturgia festo de la Cxielenpreno de diversaj sanktuloj por la komenco de la 15-a Junulara Monda Tago, katekizadoj por la gejunuloj, diversaj renkontigxoj kaj histori-kultura gvidado kaj kurso pri Romo. Por la esperantistoj respondeculo kaj kunordiganto de la JMT estas Paola Ambrosetto. Spirita gvidanto estas pastro Lajos Kobor. Cxiuj kiuj intencas partopreni la 15-an JMT-n devos oficiale aligxi. La partoprenantoj devas esti plenkreskuloj, aux almenaux agxi pli ol 16 jarojn. Pliaj detaloj estas havebla cxe: Gianluca Serbo via Nazario Sauro 23, IT-36100 Vicenza, Italio Rete: giserbo@forigu.tin.it ************************************************************************** Kompleta monata kalendaro ========================= La kompleta jara listo de E-arangxoj dauxre aktualigata de ni, troveblas en interreto http://www.hungary.net/esperanto/. Korektoj, aldonoj estas bonvenaj! Por ricevi txt-formatan version sendu mesagxon (enhavo ne gravas) al la auxtomato: kalendaro@forigu.esperanto.org * * * 15-23.01. 3-a Kuna Auxstralia-Nov-Zelanda Kongreso kaj 16-a Auxstralia E- Somer-kursaro, Sidney. Inf: s-ro Terry Manley, 143 Lawson St, Redfern NSW 2016, Auxstralio. Rete: esperfed@forigu.ans.com.au * * * 21-23.01. Ni festivalu!, Barlaston. Inf: Derek Tatton, Wedgwood Memorial College, Barlaston, Stroke-on-Trent, Staffs, Britio ST12 9DG, Britio. Tel: +44-1782-382105, Rete: wedgwood.college@forigu.staffordshire.gov.uk * * * 24-30.01. Skisemajno de REFA por gejunuloj, Poiana Brasxov. Inf: Sxtefan Mihai, str. Mircea cel Batran 39 bl. 51 ap. 26, RO-2200 Brasxov, Rumanio. * * * 25-31.01. Vintra Amika Montara Renkontigxo, Miercure-Ciuc. Inf: Jolanda Jozsi, str. Patinoarului 12-A ap. 3, RO-4100 Miercurea-Ciuc, Rumanio. * * * 27-31.01. Vintro en antikva urbo, Jaroslavj. Inf: EK Ora Ringo, pr. Matrosova 11a-18, RU-150057 Jaroslavj, Rusio. * * * 29-30.01. Interlingvistiko kaj esperantologio: perspektivoj en la 21a jarcento, La Chaux-de-Fonds. Inf: Kultura Centro Esperantista, BP. 779, CH-2301 La Chaux-de-Fonds, Svisio. Tel: +41-32-9267407. Rete: kce.esperanto@forigu.bluewin.ch * * * 29.01-05.02. Junulara Esperanto-Feriado en Bydgoszcz kun kurso pri fotado kaj filmado. Inf: Monda Turismo, M. Sklodowskiej-Curie 10, PL-85-094 Bydgoszcz, Polio. Rete: monda.turismo@forigu.esperanto.nu * * * 03-06.02. Rusia Esperantista Kongreso, Cxeboksari (Cxuvasxio). Inf: REK, a.k. 189. RU-428000 Cxeboksari, Rusio. Rete:esperant@forigu.chtts.ru * * * 05-13.02. Internacia Pedagogia Kurso Bydgoszcz. Monda Turismo, M. Sklodowskiej-Curie 10, PL-85-094 Bydgoszcz, Polio. Rete: monda.turismo@forigu.esperanto.nu * * * 12.02. La naskigxonta E-a Civito (en Berno, kunlabore kun SES). Inf: Kultura Centro E-ista, BP. 779, CH-2301 La Chaux-de-Fonds, Svisio. Tel: +41-32-9267407. Rete: kce.esperanto@forigu.bluewin.ch * * * 15-19.02. Inicado al Esperanto kaj praktikado por komencantoj, gvidas Josee Lafosse en Bouresse. Inf: Kvinpetalo, Esperanto-Centro, FR-86410 Bouresse, Francio. Tel/fakso: +33-549.428074 * * * 19.02. Semajno de la Internacia Amikeco, Leuven. Inf: Kultura Centro, Brusselsestraat 63, BE-3000 Leuven, Belgio. Rete: esperanto3000@forigu.esperanto.nu * * * 19-20.02. "Kio estas bela poemo?" Francois Degoul (Francio) prelegos, La Chaux-de-Fonds. Inf: Kultura Centro Esperantista, BP. 779, CH-2301 La Chaux-de-Fonds, Svisio. Tel/fakso: +41-32-9267407. Rete: kce.esperanto@forigu.bluewin.ch * * * 22-26.02. Preparado por (en Francio) oficiala ekzameno Kapableco. Traduko kaj disertacio. Gvidas Georges Lagrange. Inf: Kvinpetalo, E-Centro, FR-86410 Bouresse, Francio. Tel/fakso:+33-549.428074 ************************************************************************** MOVADO ////// Agado per "pozitivaj novajxoj" ============================== Dum la lasta Esperanta kataluna kongreso, estis proponita al la partoprenantoj, ke ni uzu nian "bonan lingvon", por partopreni en: - la kolektado de "Pozitivaj Novajxoj", tra la tuta mondo; - la disvastigado de tiuj dokumentoj, post tradukado en naciajn lingvojn, per iuj ajn rimedojn, elektitaj de cxiu nacia teamo. Ni konsideras "pozitivajn novajxojn", cxiujn atestojn pri "neperfortaj" agadoj (aux projektoj) koncerne la plibonigadon de: la vivkondicxoj de la homoj, bestoj, de cxiuj estajxoj; la interhomaj rilatoj; la naturprotektado, ktp... En Francio jam rezultas la agado: ni ektradukis en Esperanton la bazajn dokumentojn de la agadoj; ni jam trovis diversdevenajn personojn, kiuj eklernas Esperanton, por pli efike kunlabori en la senprofitcela asocio, titolita: "Espoirs pour les Jeunes" (Esperoj por la Gejunuloj, ESPERJUN) kiun ni kreis. Ni petas de vi, bonvolu transdoni tian mesagxon al la samlandaj samideanoj kiuj povus esti interesitaj por kunlabori en tia agado. Je via dispono por cxiaj precizoj petataj de vi, je la nomo de nia grupo. "ESPERJUN" 2 rue de l'esperanto, FR-47-109 Galapian, Francio. Rete: espergala@forigu.wanadoo.fr ************************************************************************** CxEA kongresis ============== Inter la 15-a kaj 17-a de oktobro okazis en la urbo Tabor la 9-a kongreso de Cxeha Esperanto-Asocio. Gxi inter alie elektis novajn funkciulojn, kiuj jam gvidos la asocion en la venontan jarmilon. La nova prezidanto farigxis s-ino Vera Podhradska. Kiel la ceteraj membroj de la nova sep-persona CxEA-komitato estis elektitaj. Krome, la kongreso nomumis 7 novajn honorajn membrojn de CxEA. Petro Chrdle Rete: chrdle@forigu.kava-pech.cz ************************************************************************** Konsultejo de Akademio por Esperanto ==================================== La estraro de la Akademio de Esperanto informas cxiujn esperantistojn, kaj cxefe redaktantojn de revuoj kaj jxurnalistojn / verkistojn, ke la servo "Konsultejo de la Akademio" (Pli detale pri la konsultejo vidu Eventoj n- ro 172.) estas je ilia dispono por solvi lingvajn dubojn en mallonga tempo. Se vi havas problemojn pri nomado de novaj ajxoj / aferoj, se vi havas dubojn pri la signifo de difinitaj vortoj aux se vi volas klarigojn pri difinitaj punktoj en la gramatiko de Esperanto, ne nur cerbumu tutsola, sed sendu mesagxon aux leteron al la gvidanto de la Konsultejo: Stefan Maul Pferseer Str. 15, DE-86150 Augsburg, Germanio. Rete: maul@forigu.newsfactory.net ************************************************************************** Pasxon post pasxo... ==================== Hispana Esperanto-Federacio, HEF sukcesis ricevi apartan statuson per kiu gxi estas esceptita el la pago de la imposto pri nemov-eblajxoj. Post pluraj monatoj de atendo finfine alvenis en la oficejon konfirmo, ke ni atingis tiun rajton. La sekretario debis prezenti cxe la koncerna instanco ampleksan raporton konsistantan el diversaj dokumentoj pri HEF kaj pri ties aktivado, kaj ankaux ateston el Ministerio de Enlandaj Aferoj pri tio ke ni akurate plenumas niajn administrajn devojn kiel Asocio por Publika Utilo. Miguel Gutierrez Rete: liven@forigu.nexo.es Eble en aliaj landoj ekzistas sama eblo por ne pagi "vanajn" kostojn. Indas sercxi tiujn. Cxu ne? - ndlr. ************************************************************************** Zamenhof-tago en Kroatio ======================== La 15-an de decembro okazis kadre de la Librotago publika lancxo de la nova zagreba lernolibro, la 8-a kroata eldono. La libron prezentis Damir Mikulicxicx nome de la eldonejo Izvori kaj Spomenka Sxtimec nome de Kroata Esperanto-Ligo (KEL). La solenajxo okazis en urba kaj nacia biblioteko, kiu en 1999 akceptis 2900 Esperantajn librojn kaj preskaux 300 vortarojn el la Esperanta biblioteko Gjivoje. Lige al Zamenhof-tago KEL kaj Kroata Esperanto-Junulara Asocio (KEJA) partoprenis en tritaga foiro kun 180 aliaj asocioj el Kroatio, kiuj ricevas financan helpon de la registaro por siaj projektoj. Vicprezidanto de la kroata registaro kaj ministrino pri Euxropaj Intergigxoj Ljerka Mintas Hodak vizitis la Esperantajn budojn kaj informigxis pri UK 2001. S. Sxtimec Rete: esperanto@forigu.zg.tel.hr ************************************************************************** Petu informilon pri OKEJ! ========================= "OKEJ" estas mallongigo por "Okcidenteuxropa Kunlaboro de E-Junularoj", fakte gxi estas kunlabora kaj spertointersxangxa forumo de okcident- euxropaj junularaj E-organizoj. (Funkcias similaj TEJO-rondoj en Mez- Euxropo kaj ankaux por balkanaj landoj.) En la lasta OKEJ-konferenco la cxeestantaj delegitoj ellaboris resumon pri siaj spertoj pri organizaj aferoj en 4 cxefaj punktoj: organizado; kluba vivo; varbado; enspezoj. Se vi volas ricevi la "manlibreton" de OKEJ, vi povas peti gxin de: Lode Van de Velde Rete: lode@forigu.fel.esperanto.be ************************************************************************** Lerte uzi la lokajn eblojn ========================== La E-klubo de Vasteras membrigxis al la UN-organizajxo "FolkeNs park", kaj tiel ekhavis la eblon uzi por sia kunveno agrablan klubejon kun kuirejo kaj interret-ligita komputilo. La klubo tie disponas ankaux pri propra sxranko por siaj ajxoj, pri klascxambro kaj afisxebloj. Mallonge: tre oportunaj ebloj kontraux malmultaj rimedoj... * * * En la loka radio la E-klubo dauxre disponas pri la eblo pri propra elsendo. Dekdu tiaj elsendoj estas deponitaj ankaux en interreto cxe http://www.quicknet.se/home/q-111060/radioe.htm. Cetere, en la granda katalogo de firmaoj en Vasteras kaj cxirkauxajxo Radio Esperanto estas menciita (kun adreso, telefono, ktp) sub la rubriko "Radio- och TV-Bolag", kaj krome cxe alfabeta indekso. el La Veka Bulteno 3/99 ************************************************************************** Neformala raporto pri la "novembra kunveno" =========================================== Cxeestis: Detlev Blanke, Osmo Buller, Istvan Ertl, Vladka Chvatalova, Renato Corsetti, Hans Erasmus, Christer Kiselman, Jouko Lindstedt, Marc van Oostendorp, Sandra Schweder, Humphrey Tonkin, John Wells. Inter la necxeestintoj apartan mencion pro la kontribuoj meritas: Mark Fettes, Hans Michael Maitzen, Mauxro La Torre kaj Anna Ritamaki. La cxi-sekva teksto ne estas vera protokolo, sed simpla resumo de la interkonsentoj atingitaj dum la kunveno laux la diskutitaj punktoj. Kion ni komprenas sub esperantologio, interlingvistiko kaj lingvo- politiko? La cxeestintoj debatis surbaze de la enkonduko de Mark Fettes kaj aprobis gxin. Estis proponitaj precizigoj pri: - interlingvistiko (kiu povas esti rigardata kiel kovranta largxan gamon: de minimuma variajxo - scienco pri planitaj lingvoj - al maksimuma variajxo - scienco pri internacia komunikado); - lingva politiko (kiu povas esti dividata en interna - rilata al Esperanto kaj la Esperanto-movado - kaj ekstera - rilata al la mondo). Problemoj kaj respondecoj en la kampoj de esperantologio kaj interlingvistiko kaj lingvo-politiko: Esperantologio -------------- Parto de la cxeestantoj esprimis la konvinkon, ke la laboroj pri "esperantologio" plenrajte apartenas al la Akademio de Esperanto, kiu devus preni pli aktivan rolon cxi-rilate, dum alia parto opinias, ke la Akademio de Esperanto rajtas interesigxi nur pri aplika esperantologio, cxar gxia cxefa celo restas "lingvo-planado". En cxi tiu kazo esperantologiaj studoj restu cxe CED. Oni konstatis, ke la revuo Esperantologio / Esperanto Studies, en kies redaktado kunlaboras akademianoj kaj aliaj esperantologoj, estas jam bona pasxo cxi-rilate. CED dauxrigos cxiukaze siajn nunajn agadojn pri esperantologio, sed vidus kun granda intereso pli grandan kunlaboron de la Akademio de Esperanto. La agadoj de CED cxi-kampe estas: - la bulteno Informilo por Interlingvistoj (redaktata de Detlev Blanke) - la Esperantologiaj Konferencoj kunligitaj kun la Universalaj Kongresoj. Pri la bulteno IpI oni sercxos vojojn por doni al gxi pli vastan legantaron. Gxi restos cxefe bibliografia helpilo por esperantologoj kaj interlingvistoj. La Esperantologiaj Konferencoj ek de tiu en Tel-avivo estos plurlingvaj kaj prefere okazos en lokaj universitatoj kun aktiva partopreno de neesperantistaj lingvistoj. Samtempe oni arangxos prelegojn pri esperantologio en Esperanto por la kongresanoj en la UK-ejo. Interlingvistiko ---------------- Oni notis la gxisnunajn laborojn de CED en cxi tiu kampo, tre mallonge resumeblaj jene:- La usonaj konferencoj de CED (plejparte en kunlaboro kun UN) - La revuo LPLP, kies interlingvistika sekcio estas esenca elemento en eventuala strategio. Aparta interkonsento rilatas al la estontaj klopodoj informi lingvistojn pri Esperanto: - unuflanke oni provos ripeti okaze de estontaj UK la invitadon al neesperantistaj lingvistoj veni rigardi la UK-n; - aliflanke Marc van Oostendorp kaj Jouko Lindstedt ricevis la taskon verki informilon por lingvistoj, kiu estos poste utiligata de la movado por informaj celoj. Saman uzon povus havi la artikoloj verkitaj de John Wells por angla enciklopedio, kiun John liveros fotokopie por plua utiligado. Lingvo-politiko --------------- Pri lingvopolitiko oni opiniis, ke gxi estas precipa tasko por la estraro de UEA, kiu lauxokaze petu la konkretan helpon de la AdE, CED, ktp. Dokumento uzebla estos verkata surbaze de la nunaj diskutoj kaj skribaj diskutkontribuoj. Oni aparte alte taksis la agadojn de TEJO en cxi tiu kampo. Plua kunlaboro estas nepre necesa. Terminologia Esperanto-Centro ----------------------------- La gxenerala opinio estas, ke oni refondu gxin. Unua tasko tiurilate estas la trovado de junaj homoj, kiuj volos prizorgi gxin. Tion nun Blanke kaj la estrarano pri Faka Agado, Petro Chrdle, provas fari. Reta diskut-listo tiucela estis jam starigita. Ankaux cxi-rilate la kunlaboro de la Sekcio pri Teknikaj Vortaroj de la Akademio de Esperanto estas bonvena kaj petata. Samtempe oni direktis rekomendon al la cxeestantaj reprezentantoj de TEJO por ke ili helpu por trovado de junaj terminologoj kaj pli gxenerale esperantologoj. Instruado de Esperanto en universitatoj, instruado de interlingvistiko en universitatoj, instruado pere de Esperanto en universitatoj oni konsentis ke: - instruado de Esperanto en universitatoj ('simplaj' lingvo-kursoj) estu prefere kunordigata de ILEI; - instruado de interlingvistiko (en sia vasta signifo) estu prefere kunordigata de CED; - instruado pere de Esperanto (kaj kunordigado) de tiu instruado estas agado jam farata de AIS, kiun ni helpu plenumi gxin ankoraux pli vaste. Aliaj apartaj temoj diskutitaj ------------------------------ Oni rekomendas, ke la Akademio de Esperanto petu la helpon de neesperantistaj fakuloj pri lingvoplanado por havi ideojn pri la organiz- maniero de scienca lingvo-plana instanco. Pri komputilaj kaj retaj organizado de la laboroj oni pensas ke: - diskutlisto por terminologoj jam ekzistas kaj gxi estu dauxrigata; - la diskut-listo "BJA-listo" alprenu la rolon de diskutlisto por CED, kaj tiel helpu reorganizi CED-on kaj kunmeti novan labor-teamon (pri tio zorgos Humphrey Tonkin);la diskut-listo pri instruado de Esperanto de ILEI povus ludi ankaux la rolon de diskut-listo pri instruado en universitatoj; - la retpagxoj de CED plugastu cxe Esperantic Studies Foundation - la Akademio de Esperanto esploru la eblecon utiligi la pagxojn tiutemajn de Bertilo Wennergreen, kies ret-adreso aperu en la pagxoj de UEA. Oni ricevis informojn pri la projektoj "Neighbour" kaj "Relais", kaj pri la strategio por ekplenumi ilin. Oni ankaux ricevis informojn pri la eblaj fontoj de monrimedoj, cxefe cxe la Euxropa Unio, fare de Michael Cwick. Oni rekomendis ke recenzo de la libro de Gledhill (anglalingva lingvistika priskribo pri Esperanto) aperu en la revuo "Esperanto". Esperantic Studies Foundation informis, ke: - la bulteno Esperantic Studies estas liverebla senpage al interesaj lingvistoj, kies adresojn oni donos; - estas je dispono mono por eventuale pagi unu homon, kiu okupigxu pri inventaro de la ekzistantaj esperantologiaj fontoj. Oni sercxas kandidatojn. La ideo pri eventuala jura memstareco de CED, kiu helpus por trovi financajn rimedojn, estis taksata ankoraux nematura. Renato Corsetti ************************************************************************** REAGOJ ////// Kiu konstruis la 1-an auxtomobilon ================================== Mi volas atentigi pri kontrauxdiroj en argumentado de kelkaj aktivuloj. - Antauxnelonge aktivulo skribis al iu gravulo pri la lingva problemaro ene de EU kaj pledis favore al Esperanto. Li ja substrekis la facilecon de la lingvo, kaj por pruvi ke tiu lingvo tamen estas suficxe ricxa, li menciis i.a. PIV kun 1.303 pagxoj kaj la "Plenan Analizan Gramatikon, PAG" kun 599 pagxoj. - Cxu lingvo, kiu bezonas 600 pagxan gramatikon, povus esti facila? - Ni povus kompari nian argumentadon al tiu de la auxtovendisto: cxu li rakontas al kliento, ke la unuan auxtomobilon kreis franca ingxeniero Eduard Delamare-Debouteville en 1883? Tute ne! Kliento interesigxas nur pri la nuna efikeco de la veturilo. Sekve pri E-o ni klopodu pruvi gxian efikecon per konkretaj aplikadoj por plej diversaj celoj, ekzemple kiel laborlingvo de AIS, pro fakaj celoj aux pro kultur-artaj arangxoj, festivaloj. Germain Pirlot ************************************************************************** INSTRUADO, ILEI /////////////// Nekutima lernolibro kun primovadaj informoj =========================================== En alilingvaj lernolibroj kutime oni instruas la lingvon mem, kaj la malantauxan kulturan fonon. Tio malofte okazas en E-lingvaj lernolibroj (kvankam esceptoj ja ekzistas), kaj cxefe ne estas kutimo en lernolibroj instrui ankaux la utilig-eblon de E-o kaj celon, strukturon de la movado. En Hungario antaux 2 semajnoj aperis 170-pagxa "Resuma Esperanto- gramatiko" (redaktita de mi cxe la eldonejo Eventoj), kiu krom la lingvaj eroj enhavas ankaux cx. 50-pagxan nacilingvan cxapitron pri la E-movado (ekesto de la Internacia Lingvo, E-servoj, utiligebloj, interreto, organizoj, ktp - cxie kun konkretaj priskriboj kaj adresoj) - kaj klopodas instigi la lernanton ne nur gxui la avantagxojn de Esperanto, sed ankaux persone kunlabori al la funkciigo de la movado. Mi opinias, ke la instruistoj grandparte respondecas pri la movada eduko de la lernantoj, ja dum la dauxro de la kurso por la lernantoj la instruisto signifas la "kunligulon" al Esperantujo. Se dum la kurso ni ne sukcesas ilin eduki "esti esperantisto" - poste jam estas multe pli malfacile... La enmeto de tiu nacilingva "movada cxapitro" en la lernolibron donas realan sxancon, ke la lernanto legos gxin, li povas reveni al iu temo ankaux post la kurso (ja li acxetis, do posedas la libron), povas trovi la necesan informon kaj adreson, krome tiu resuma informo eble ofte helpas ankaux al la instruisto, kiu mem eble ne cxiam estas informita pri cxiuj ebloj, servoj, kaj aktualaj adresoj. Simile al la pasintjare eldonita de ni E-vortaro, ankaux tiu cxi gramatik- libro - krom la movadaj libroservoj - estas acxetebla en ordinaraj librovendejoj dise tra la lando. Laszlo Szilvasi ************************************************************************** KONKURSOJ ///////// EKRA-2000 ========= Esperantista domo de kulturo "D-ro Ivan Kircxev" en Razgrad (Bulgario), anoncas literaturan konkurson, "EKRA-2000" pri poezio kaj humurajxoj originale verkitaj en Esperanto en libera temo. La verkoj ne devas esti jam publikigitaj kaj partoprenintaj en aliaj konkursoj. Verkojn por la konkurso, subskribitajn per pseuxdonimo, oni sendu en tri ekzempleroj al la organizantoj. La nomo kaj la adreso de la auxtoro estu en aparta koverto surskribita per la sama pseudonimo. La jxurio kunsidos la 31-an de majo 2000. La premioj estos Esperantaj libroj kaj diplomoj. La anonco de la rezultoj kaj la premiado okazos kadre de la Esperanta kultura festo "Abritus-2000" en Razgrad, inter 2-4 de junio 2000. Esperantista domo de kulturo "D-ro Ivan Kircxev", str. "Sv. Kliment" EK-3, BG-7200 Razgrad, Bulgario ************************************************************************** GAZETOJ /////// Songazeto por blinduloj ======================= Ekde la jaro 1995 aperigas la Rusia Esperanto Asocio de Nevidantoj 90 minutan sonkasedan revuon kun la titolo "Vocxo de Amikeco". Dumjare aperos 4 numeroj. Auxdonte la sonmagazinon vi povos ekscii pri E-movado en Rusio kaj eksterlande, ekauxdi kantojn kaj literaturajxojn, kiuj estas plenumitaj dum E-renkontigxoj kaj E-kongresoj. Gxi enhavas ankaux sonigitajn artikolojn el rusiaj kaj eksterlandaj E-periodajxoj. Abonprezo por la jaro 2000 estas 48 RUR. Mendi la revuon kaj pagi eblas cxe la adreso: Vladimir Rassohin Vladimir a/j 96, RU-352900, Armavir, Rusio. Rete: bespalov@forigu.sochi.ru ************************************************************************** RADIO ///// Kie kapti Varsovion? ==================== Ni memorigas la elsendohorojn kaj frekvencojn de la E-elsendoj de Pola Radio: - 15.30 h - 41,18 m (=7285 kHz); 41,52 m (=7225 kHz) - 20.00 h. - 41,64 m (=7205 kHz); 49,22 m (=6095 kHz) - 08.00 h. + 10.30 h. nur persatelite (ripeto de la programo auxdigxinta la antauxan tagon) per Eutelsat II F-6 (Hot Bird), 13 gradoj de la orienta latitudo; frekvenco 11,474 GHz kun horizontala polarizado (H), sonportanto 7,38 MHz Retadreso por Real-Audio: http://www.wrn.org/stations/poland.html Ni memorigas, ke multaj sonmaterialoj de la E-redakcio de Radio Polonia trovigxas cxe la adreso de nia auxstra auxskultanto Anton Obsernsdforfer cxe http://start.at./retradio Rimarkojn pri programoj de la E-Redakcio atendas Radio Polonia, E-Redakcio pk. 46, PL-00977 Varsovio, Polio Rete: pettyn@forigu.radio.com.pl ************************************************************************** KULTURO /////// 5 diskoj de Esperanto-historio ============================== Cele al dokumentigo de gravaj historiaj faktoj de Esperanta Movado, oni regravuras, sur kvin kompaktaj diskoj, paroladojn, recitadojn, k.a., precipe de famaj esperantistoj, kiel Privat, Cannuto, Lapenna, Baghy, Sekeli kaj aliaj eminentuloj de la esperantistaro, dum Universalaj Kongresoj kaj aliaj eventoj. Cxar oni reproduktis la materialon el malmovaj sonbendoj kaj diskoj, la vocxoj ne cxiam estas lauxtaj, sed kompreneblaj. Oni devas, ne nur konsideri la historian valoron de tiuj enhavoj, sed konsideri ankaux la belecon kaj eblecojn por perfektigi nian lingvoscion. Gxi utilas ankaux al gelernantoj. Mendo kaj informigxo eblas cxe: Gramophone Produtora de Audio Rua Curupis, 450, BR-80310-200 Curitiba (PR) Brazilio Rete: gramofone@forigu.gramofone.com.br ************************************************************************** MUZIKO ////// Tri kasedoj el Kubo =================== Antaux nelonge aperis en Kubo tri novaj kasedoj kun tipa kuba muziko. La kasedo, "Vocxoj el Kubo", enhavas naux famegajn kantojn, ekzemple: "Kisu min Multe" kaj "Guantanamera". "Latinamerika mozaiko" prezentas 16 kantojn, ekzemple: "Konversacio en tempo de Bolero", "Finigxas la amo", "Tiu vespero". La kasedo, "Pensi kaj Ami Esperante", estas kolekto de 19 kantoj tradukitaj el la hispana (de Hector Jimenez) aux originalaj (de Julian Hernandez). Cxiujn tri kasedojn akompanas tekstofolioj, ili haveblas cxe: Flandra Esperanto Ligo Rete: retbutiko@forigu.fel.esperanto.be ************************************************************************** MALLONGE //////// Sveda Esperanto-Federacio, SEF starigis standon dum la Eduka Ekspozicio en Stockholm, Svedio. * * * Kroata Essxeramto-Junulara Asocio partoprenis landan seminarion kontraux drogoj. * * * En finna porinfana teatrajxo la cxefpersono kantas finndevenan kanton, la premiero okazis en oktobro en Turku, Finnio. * * * Cxina Fervojista Esperanto-Asocio, CxFEA kunsidis dum la 4-a Cxina Esperanto-Kongreso, dum la kunsido oni pridiskutis kiel pli fortigi la movadon en Cxinio. * * * Aperis la finna adapto de la libro "Egaleco kaj paco per Esperanto" de Lars Forsman, gxi estas utila materialo por komencantoj lerni la Internacian Lingvon. * * * Ankaux Esperantaj libroj estis ekspoziciitaj dum la Internacia Librofoiro en Israelo. * * * Strato en Nasxice (Kroatio) ricevos la nomon de kroata esperantisto, Mavro Sxpicer, kiu naskigxis en tiu urbo. * * * En katalogo de firmaoj de Vasteras, Svedio la loka radistacio estas menciita kiel "loka radio en Esperanto kaj en la sveda". * * * Aperis 500 pagxa fotoalbumo pri la pola urbo Bydgoszcz, la eldonajxo havas ankaux Esperantlingvan resumon. * * * "La Ondo de Esperanto" denove elektis "La esperantiston de la jaro" kun partopreno de reprezentantoj de diversaj tendencoj en la Esperanto- komunumo kaj sendependaj kompetentuloj. Cxi jare estis elektita Kep Enderby, prezidanto de UEA. * * * Okazis solena vespero omagxe al 110-jara naskigxdatreveno de ukraina esperantisto, Vasilij Jarosxenko. La arangxo estis bona eblo pliproksimigi la diversajn flankojn de ukraina Esperanto-agado, cxar kunvenis la estro de multaj landaj E-asocioj. * * * La revuo Esperanto sub la Suda Kruco estas havebla per la Interreto en la formato PDF. Eblas elsxuti la revuon kaj legi gxin surekrane. La revuo troveblas cxe: http://www.geocities.com/Athens/Olympus/6878/esk-l3.htm ************************************************************************** ANONCETOJ ///////// La 8-an de decembro 1999 mortis Honora Membrino de Universala Esperanto- Asocio kaj Cxeha Esperanto-Asocio sinjorino Marie Bartovska. * * * 45-jaragxa, juntipa, altkreska, maldika (sen ventrego), nefumanta, muzikama, diplomita, aparte vivanta (eksedzigxonta) viro kun favora apero, kun kvieta sereno, kun animo kaj agrableco sercxas jun(tip)an, mildan, allogan, hungaran amikinon resp. vivkunulinon. Telefono (vocxposxto, SMS): 06-20-9921845 Stefano * * * Mi estas 24-jara cxina frauxlino kun bela aspekto kaj simpatia koro, kaj esperantistinigxis en 1999. Nun eleganta mi laboras kiel jxurnalistino. Mi deziras amikigxi kun cxirkaux 30-jara sentema, respondeca ,ricxa frauxlo el eksterlandoj por fondi E-internacian familion. Mi deziras vivi kun li en lia lando aux nia lando. Mi esperas, ke la frauxlo ankaux estas katolikano aux kristano kun intereso je cxina tradicia kulturo. Bonvole interesantoj kontaktu min kun sia foto: WANG Nan, Mi-Jia-Qiao Xiaoqu 49#, Gao-Xin-Lu 25 Hao, CN-710075 Xi'an, Cxinio. Aux rete: iwangnan@forigu.pub.xaonline.com * * * La sekva kunveno de la Budapesxta E-Klubo okazos la 25-an de januaro en la kutima loko: VIII. Gyulai P. u. 9. Prelegos dr. Ferenc Jaki pri: "Renkontigxo kun Petofi en Pekino". Cxiuj interesigxantoj estas bonvenaj! ************************************************************************** KORESPONDI DEZIRAS ////////////////// 12 j. knabo deziras korespondi, hobioj estas sporto, komputilaj ludoj, botelaj korkoj, moneroj, monbiletoj, bildkartoj, kalendaretoj. Adreso: Abit Burlakov, ul. Majskaja 21B-1, Krasnojarsk, RU-660020, Rusio. * * * Mi estas hungara virino, kaj atendas leterojn pri div. temoj el div. landoj, cxefe el Cxehio, Slovakio, Germanio kaj Rumanio. Min cxefe interesas la medicino (tradicia kaj moderna), sano de la homo, sanitara prizorgo. Maria Tilimpas, Kolcsey u. 28, HU-6900 Mako, Hungario. * * * Mi estas 43 jaragxa, pasia pri la prahistorio (paleolitiko kaj precipe neandertaluloj), kaj deziras korespondi kun gesamideanoj el ie en la mondo pri tiu temo. Franciska Colin, La Bouionniere, FR-87210 Oradour St Genest, Francio. ************************************************************************** INTERESE //////// Stranga varbilo por Esperanto ============================= Okaze de la konferenco de MOK (Monda Organizajxo pri Komerco) mi partoprenis manifestacion de RAR (Rekta Agada Reto) kaj la Usona Sxtallaborista Sindikato. RAR estas kunliga organizo de diversaferaj aktivuloj (pri mediprotektado kaj diversaj aliaj temoj). Mi portis afisxojn kun la tekstoj: "MOKU MOKon!"; "Rifuzu la anglan! Ne uzu la anglan! (En internaciaj komerco kaj komunikado)"; "ESPERANTO / internacia lingvo / Oponu anglan hegemonion!" Kaj mi disdonis informfoliojn pri Esperanto. Fine de la tago, Seatla Polico dozis min per larmiga gaso (mia unua sperto pri tiu fama kemiajxo!), kio estis tre larmiga. Liland Brajant Ros' Rete: lilandbr@forigu.hotmail.com ************************************************************************** Germanoj suferas pro nova lingvo ================================ "Denglish" estas la nova lingvo kiu trovas novajn adeptojn en Germanio. Temas pri miksajxo de la germana lingvo (deutsch) kun la angla (english). La novajxo multe kolerigas la popolon en Germanio cxar la plimulto havas rudimentajn sciojn pri la angla lingvo. Laux esploro de la revuo "Stern", nur unu triono de la germana logxantaro scias paroli (malbone) la anglan. Alia parto (proksimume alia triono) komprenas kelkajn vortojn. Kaj la ceteraj komprenas nenion pri "la lingvo de Shakespeare". Malgraux tio, la germanoj estas devigataj lerni la anglan por cxiutagaj devoj. Fervojaj stacidomoj ("banhof" en la germana), ricevos afisxojn kun la vorto "station". La entrepreno Telekom (germana) ankaux uzis anglajn esprimojn por klasifiki siajn telefonajn tarifojn. Por meti finon al tio, estis kreita la Asocio por la Protekto de la Germana Lingvo" kiu elektas ekde la jaro 1997, la "Trompiston (falsiston) de la Germana Lingvo de la Jaro". Inter la jam elektitoj trovigxas la stilistino Jil Sander, kiu jam ne plu scias esprimi ecx unu frazon en sia gepatra lingvo sen la uzo de la angla, la direktoro de Telekon, Ron Sommer, kaj la estro de la fervoja reto de la lando, Joannes Ludeqig. Tradukis el brazila gazeto: Joao Manoel Aguilera Junior Rete: klubo@forigu.correionet.com.br ************************************************************************** Plej longa nokto en Irano ========================= Irananoj havas multajn tradiciojn, unu el ili koncernas plej longan nokton dum jaro nomata "Jalda". Gxi estas siria vorto signife naskigxo kaj naskigxtempo. Oni ankaux konas gxin kiel la naskigxtempo de Mesio. En persa lingvo, gxi rilatas al la plej longa nokto en cxiu jaro. Tio estas la lasta vespero de la auxtuno aligxante la unuan nokton de la vintro (21-a de decembro). La familioj en Irano, kutimas kunveni tiuvesperen kaj babilante mangxi sekajn kaj fresxajn fruktojn (cxefe akvo-melonon), nuskojn, rostitajn grajnojn ktp.Ili ankaux parolas pri mem kaj familiaj problemoj trankvile, de la fina vespero de la auxtuno gxis la unua nokto (ecx meznokto) de la vintro. Cxi tradicio havas radikon en la antikva historio de Irano. Reza Sajadian Rete: sajadian@forigu.dpir.com ************************************************************************** ************************************************************************** EVENTOJ, n-ro 178, 2/januaro-2000 Internacia sendependa gazeto pri la Esperanto-movado Reg.nr: B/TSZL/85/1991. ISSN 01215-959 X Eldonas LINGVO-Studio kaj Kultura Esperanto-Asocio. HU-1675 Budapest, pf. 87. Tel./fakso: +36-1-2828885. Retposxto: eventoj@forigu.esperanto.org Retpagxo: http://www.esperanto.hu/eventoj-enirejo.html Aperas dusemajne. Redaktas: Axel Orszag-Krysz Respondeca eldonanto kaj cxefredaktoro: Laszlo Szilvasi. Oficeja kunlaboranto: Istvan Meszaros. La redakcio ne nepre konsentas pri la enhavo de unuopaj artikoloj, kaj ne respondecas pri la anonc-enhavoj. Abonkotizo: 74 NLG (aere 86 NLG) al la UEA-kodo ELLS-S. ************************************************************************** **************************************************************************