Eventoj, n-ro 159, 1/januaro 1999, retposxta versio
***************************************************

Enhavo
------

TITOLPAGxE:      - Kunlabore trans movadaj limoj - novjara mesagxo de la
                   prezidanto de UEA

FAKA APLIKADO:   - Seminario pri aplikado de E-o en la scienco kaj tekniko
                   Raporto pri la praga kunveno.
                 - Vendoplaco, foiro, bazaro en la UK!
                 - Nova medicina revuo aperis en Kievo
                 - Komerca oportuno por esperantistoj - Ebleco perlabori
                   monon nur promenante tra vendejoj...
                 - Hispana ensemblo venkis en la cxi-jara Festivalo de
                   Popolaj Orkestroj

ARANGxOJ         - Arta festivalo EoLA-11
                 - Kubo atendas eksterlandanojn en marto!

MOVADO           - Komuna kampanjo de SAT kaj UEA!
                 - Esperanto kaj politiko - Cxu Esperantaj organizoj
                   okupigxu pri politiko?
                 - "Kampanjo UEA" en Koreio
                 - Apudvoja tabulo ankaux Esperante en Slovakio
                 - Rekorda partopreno estas atendebla en Berlino
                 - 85 mil spektantoj sekvis la unuhoran TV-filmon
                   pri Zamenhof
                 - Cxu Esperanto-agado devas esti profitcela?
                 - La franca lingvo perdas terenon favore al la angla
                 - Delegita reto de UEA sub lupeo
                 - Averto pri monpetaj leteroj
                 - La Montpeliera libroservo starigis novan rekordon
                 - Afrika Gospel-grupo en Finnio
                 - Preparoj por la nova Euxroparlamento
                 - Junulara Azia Movado bezonas cxiujn
                 - Nomoj de Kalocsay
                 - Mondo sen interpretistoj - ekspozicio en Cxehio

OPINIOJ          - Nekonsciita lingva koloniigo - auxstraj infanoj amas
                   la anglan

INSTRUADO, ILEI  - Kompilu ekzercojn - petas la Pedagogia Eksperimentejo
                   de la Tria Roma Universitato
                 - 1 kredito el 75 - E-kurso en finna liceo proksimigas
                   al la fina ekzameno

KONKURSOJ        - Alvoko por partopreni la 50-ajn Belartajn Konkursojn

RADIO           - Esperanta retradio

Interese, anoncetoj, mallonge, korespondado ktp.


***************************************************************************
***************************************************************************


TITOLPAGxE
//////////


Novjara mesagxo de la Prezidanto de UEA por 1999

Kunlabore trans movadaj limoj
=============================

En la bilanco pri la agado en 1998 elstaras la 83-a Universala Kongreso en
Montpeliero, la plej granda esperantista renkontigxo de post la Jubilea
Jaro 1987. Tiu UK, kiun salutis i.a. la gxenerala sekretario de UN, imponis
ankaux per la abundo de sia programo. Felicxaj tiuj, por kiuj gxi estis la
unua UK, cxar al ili tiu sperto certe estis aparte emocimova!

En 1998 mi precipe gxojis pro la dauxre kreskanta tendenco al kunlaboro kaj
al flankenigo de malnovaj diferencoj kaj kontrauxecoj. En Montpeliero tio
konkretigxis en la unua Strategia Forumo de la Esperanto-Komunumo.

Tiu libera formo de kunlaboro denove kolektigxos en Berlino. Gxi celas
plifortigi la senton de kunaparteno de la partoprenantoj kaj en tiu spirito
disponigi sxancon por intersxangxo de ideoj. Ni ne revas trovi en gxi la
Sxtonon de la Sagxuloj. Mi tamen fidas, ke cxiu ricevos novajn impulsojn
por sia agado kaj ke precipe profitos la kunlaboro trans la limoj kiuj gxis
nun dividis nin.

Rimarkinda ekzemplo pri la nova evoluo estas la proksimigxo inter
Universala Esperanto-Asocio kaj Sennacieca Asocio Tutmonda. Estante membro
de ambaux, mi estas aparte felicxa pri gxi. Efektive cxiuj aplauxdis tiun
evoluon, kiu estas des pli signifa, cxar UEA kaj SAT estas la cxefaj
fadenoj, cxirkaux kiuj teksigxis la historio de nia movado. Ambaux
konstatis ke ili fakte ne estas rivaloj kaj ke el ilia kunlaboro profitos
ne nur ili mem, sed la tuta afero de Esperanto. Laux ideo de SAT ili jam
ekpreparis informkampanjon cxe pac-organizajxoj kiel sian unuan komunan
projekton.

En sia 90-a datreveno UEA okazigis kune kun la oficejo de la Alta Komisiito
de UN pri Homaj Rajtoj seminarion pri la lingva dimensio de la homaj
rajtoj, tiel omagxante ankaux la 50-jarigxon de la Universala Deklaracio
pri Homaj Rajtoj. Estis grave, ke sine de la homrajta organismo de UN ni
povis atentigi pri la lingvaj rajtoj, kiujn oni dauxre ignoras kaj
bagateligas. Kun la sama celo - konsciigi pri ne-konsciata problemo kaj
gxia ecx malpli konsciata solvo - UEA organizos en Berlino la duan Nitobe-
simpozion pri "Tutmondigxo kaj lingva diverseco".

Mia altestimata antauxulo, prof. Lee Chong-Yeong, iniciatis Kampanjon 2000.

La pozitivaj evoluoj, kiujn ni nun notas, estas gxia frukto. Kun rekorde
vigla partopreno la elektado de komitatanoj B de UEA en 1998 fakte farigxis
referendumo, en kiu la membroj de UEA plene apogis tiun iniciaton. Tamen,
Kampanjo 2000 ne estas kampanjo de UEA sola. Gxi estas celita por nia tuta
komunumo, kaj mi tre gxojas ke tiu invito al agado vere estis akceptita.

La nova elano inter ni estas la plej granda atingo de Kampanjo 2000.
Felicxan novan jaron al cxiu Esperanto-aganto!

Kep Enderby
prezidanto de UEA

***************************************************************************

FAKA APLIKADO
/////////////

36,6  øC
========

En Kievo estas lancxita nova medicina revuo "36,6" kies unua numero entenas
tutpagxan artikolon de Sergej Vargatij "Lingvo de Yumeiho estas Esperanto".
En gxi estas malgranda skizo kio pri la lingvo mem, pri UMEA (Universala
Medicina E-Asocio), pri Masajuki Sajonji kaj Instituto de Preventa Medicina
Praktiko en Tokio kaj eblecoj de la Yumeiho-terapio.

Interese, la auxtoro de la artikolo mem ellernis Esperanton nur pro tio, ke
ekzamenon pri la rajto uzi la Yumeiho-metodon eblas fari nur en la japana
aux en Esperanto, kaj por la 3-a kaj 4-a gradoj - nur en la internacia
lingvo.

Mikaelo Lineckij

***************************************************************************

KAEST '98 - Prago 13-15.11.98

Unu el la plej valoraj
======================

Inter 1978-88 regule okazadis la renomaj renkontigxoj: "Seminario pri
aplikado de E-o en la scienco kaj tekniko". Post 10-jara pauxzo Petro
Chrdle (nova estrarano de UEA pri la fakaj asocioj) decidis revivigi tiun
tradicion, kaj denove organizi kunvenon de esperantistoj, aktive
utiligantaj la lingvon ne nur por hobiumado sed ankaux por faka aplikado.

La kolokvon partoprenis cx. 40 de homoj el 8 landoj, inter ili pluraj
profesoroj, dekanoj - kaj ingxenieroj, esploristoj aux "simplaj" aktivuloj
kaj interesigxantoj.

Dum la kolokvo oni ne nur povis auxskulti tre interesajn prelegojn el vasta
gamo de fakaj brancxoj (sekcioj pri modernaj rimedoj de komunikado, kaj
terminologiaj problemoj de faka aplikado) sed oni povis pridiskuti
demandojn post cxiu prelego.

La kunveno estis por mi unu el la plej valoraj kaj interesaj ne nur pro la
alta kvalito kaj enhavo de la prelegoj, ne nur pro la multaj interesaj
cxeestantaj personoj, ne nur pro la lerte organizita distra programo - sed
pro la fakto, ke la nuna kolokvo povas esti gxermo de nova serio de fakaj
kunvenoj, kie oni ne nur babilumas pri farendajxoj - sed fakte okupigxas
pri la aplikado de la lingvo kio ja estas unu el la cxefaj celoj de E-to.

La prelegoj lauxplane aperos ankaux libroforme cxe la organizinta firmao
Kava-Pech. Dauxrigo de la kolokvo: espereble sekvajare...

Laszlo Szilvasi

***************************************************************************

Popolaj orkestroj kaj dancoj
============================

La Internacian Festivalon de Popolaj Orkestroj organizas cxiujare en junio
la Etnografia Muzeo de Torun, Polio. La prezentadoj de la tuta festivalo
okazas en Esperanto, do la partoprenantaj ensembloj el Litovio, Hungario,
Italio, Polio, Rusio, Cxehio, Hispanio, ktp. devas kunporti E-
interpretiston.

La premion por grupoj kaj la premion por solista dancisto (cxi-kaze paro)
en la 18-a festivalo en 1998 gajnis la hispana ensemblo "Centro Aragones en
Valencia". Post la fino de la festivalo la grupo estis invitita prezenti
sian programon ankaux en la urbo Ciechocinek kaj en Varsovio, kie la
televid-jxurnalisto Roman Dobrzinski intervjuis ilin en Esperanto.

Augusto Casquero

***************************************************************************

Vendoplaco en UK!
=================

Dum la UK en Berlin IKEF kaj TAKE komune arangxu vendoplacon, foiron,
bazaron, en kiu esperantistaj komercistoj povas oferti/vendi siajn varojn -
estis la ideo, kiu naskigxis dum la lasta Universala Kongreso en
Montpellier inter la cxeestantoj de la kunsidoj de IKEF (Internacia Komerca
kaj Ekonomikista Fakgrupo) kaj de TAKE (Tutmonda Asocio de Kontruistoj-
Esperantistoj).

Por povi gxuste decidi, kiom da loko estas necesa, la organizantoj de la
foiro nepre bezonas la indikon kaj ideojn de tiuj membroj de IKEF kaj
TAKE/LA DOMO, kiuj intencus uzi parton de la disponebla loko por vendi
siajn varojn. Interesatoj bonvolu sendi informon gxis 15-a de februaro 1999
pri iliaj planoj, t.e. aparte pri la speco de la varo ofertota kaj pri la
bezonata loko en kvadrataj metroj aux longo de gicxeto kaj pri la
tempodauxro de agado tie (ekzemple tuta semajno plentage, aux 2 tagoj
plentage, aux tuta semajno posttagmeze).

La organizantoj ne povas garantii la postulatan lokon, sed la disponebla
spaco estos dividita inter la interesatoj. La membroj de IKEF kaj TAKE
havos avantagxon, sed se la spaco suficxas, aliaj Esperanto-parolantaj
komercistoj povas ricevi lokon.

Bonvolu sendi viajn informojn per ordinara letero, telefakso aux retposxto
al la prezidanto de IKEF:

Franz Josef Braun
Hornisgrindestr. 8, DE-77815 Buhl, Germanio
Fakso +49-7223-942065
rete: F.J.Braun@forigu.t-online.de

***************************************************************************

Komerca oportuno por Esperantistoj
==================================

La novjorka firmao MUZIKOM invitas vin partopreni en senprecedenta komerca
projekto, kiu efike demonstras la utilon de Esperanto en internacia
komerco.

Nia sigelo KLAS-1 aperas kiel garantio de auxtenteco sur kompaktdiskoj kaj
diversaj aliaj varoj, fabrikataj sub licencoj obtenitaj de niaj klientoj.

Se vi pretos kunlabori, vi devos viziti vendejojn, butikojn kaj magazenojn
en via loka urbo, kaj kontroli cxu nia sigelo trovigxas sur specifitaj
varoj. Vi estos pagata pro livero de raporto per tradicia posxto, fakso aux
retposxto al nia oficejo. Nia adreso:

MUZIKOM, Bernard Stollman,
24-a etagxo, 515 Madison Avenue, NY-10022 New-York, Usono
Fakso: +1-212 758 4332
Rete: gardrajt@forigu.aol.com

***************************************************************************

ARANGxOJ
////////

Pupoj, kantoj, arto!
====================

Por partopreni la Internacian Festivalon de Esperanto-Arto "EoLA-11" dek
aktoroj de kieva urba pupteatro komencis lerni Esperanton. La
cxefregxisoro, Sergej Jefremov, estrarano de UNIMA (Internacia Unuigxo de
Pupteatroj), iam jam okupigxis pri la Internacia Lingvo kaj fine de SEJT-20
(Somera Esperantista Junulara Tendaro) en 1980 li estis elektita "Mister
Evento"! (de la tendaro, kaj ne de la gazeto. - ndlr)

La arangxo EoLA (Esperanto: Lingvo Arta) estas unu el la plej konataj artaj
arangxoj, kie dum la tuta tempo sonas kantoj, versoj, tetrajxoj - kaj rolas
multaj konataj E-artistoj - do indas partopreni! Cxi-jare gxi okazos en
Kiev, Ukrainio inter 05-09 marto. Pliaj informoj cxe

Mihail Lineckij
a/ja 4, UA-254200 Kiev, Ukrainio
lineckij@forigu.esperanto.nu

***************************************************************************

Karibaj noktoj
==============

Inter la 11-13 de marto 1999 Havano farigxos renkontigxejo de landaj kaj
eksterlandaj esperantistoj. Kuba Esperanto-Asocio invitas vin partopreni la
Trian Nacian Kongreson.

"Sojle al la Tria Jarmilo" - la kongresa programo enhavos kernajn temojn
kiuj altiros la atenton per klerigaj eroj, prelegoj, rondaj tabloj, forumo
pri la rolo de E-o en la tria jarmilo, turismado kaj artaj vesperoj kiuj
prezentos al la kongresano maturan kaj samtempe junan movadon.

Por eksterlandaj kongresanoj KEA organizos antaux- aux postkongresan
restadon por turismi, viziti interesajn lokojn, ekspresajn kursojn, kaj
aliajn laux antauxmendoj. Por pliaj informoj kontaktu:

Kongresa Preparkomitato
Pf. 5120, CU-10500, Havano
rete: kubesp@forigu.ip.etecsa.cu

***************************************************************************

MOVADO
//////

Esperanto kaj politiko
======================

Cxu povas neuxtrala Esperanta junulara asocio okupigxi pri politiko?
--------------------------------------------------------------------

Al tiu demando respondis jese JEFO (Junulara Esperantista Francia Organizo)
dum sia komitatkunsido de 1997-10-25/26. Tiam ekis la kontaktado kun cxiuj
demokratiaj partioj de Francio (la fasxisma "Front National" ne estos
kontaktata). Tamen Esperanto-asocioj havas membrojn kun tre diversaj
politikaj opinioj. Kiajn politikajn demandojn povas trakti niaj asocioj?

Junulara E-asocio povas trakti cxiujn demandojn rilatantajn al lingva
politiko (vidu ankaux la artikolon de David van Bezooijen "Traktato de Juna
Amsterdamo" en la bulteno "Jen" n-ro 136). Cxar fakte nia aligxo al ia
esperantista asocio jam estas politika pasxo, kiu indikas nian sintenon
rilate al lingvoj (libereco, egaleco, frateco), almenaux pri tio povas
asocio esprimi la opinion de cxiuj siaj membroj.

Dum la lastaj ses monatoj okazis (en Parizo) pluraj kunvenoj kun la
progresemaj partioj (t.e. Komunista Partio, Socialista Partio, Verduloj).
Aliaj partioj prokrastas kunvenon, sed ne rifuzis renkonti niajn
delegaciojn (t.e. Movado de la Civitanoj, Radikaluloj, Unuigxo Demokratia
Francia, Arigxo Por Respubliko).

Fakte ne nur membroj de JEFO partoprenas tiujn kunvenojn. Eble sxajnus iom
komplika la situacio pri poresperantaj asocioj en Francio, sed sciu nur, ke
cxiu delegacio konsistas el membroj de tri gxis kvin asocioj (kelkaj homoj
membras en pluraj asocioj, sed ne mencias tion dum la kunvenoj). Do agado
iniciatita de unu junulara asocio arigis plurajn esperantistajn asociojn.

Cxu kontaktado kun politikaj partioj kongruas kun Kampanjo 2000?
----------------------------------------------------------------

En sia plano por la jaroj 1997/2000 UEA instigas cxiujn esperantistojn kaj
cxiujn Esperanto-organizajxojn al plia agado, kontaktado kaj rilatado kun
la (ankoraux) ne-Esperantaj medioj. Tiaj agadoj celus (1e) plifortigi niajn
internajn strukturojn, (2e) plialtigi la prestigxon de nia internacia
lingvo kaj (3e) influi la internacian vivon.

Kiel la agado iniciatita de JEFO enkadrigxas en tiu plano?
----------------------------------------------------------

Per kunlaborigo de pluraj asocioj JEFO jam sukcesis kontribui al la unua
punkto. Tamen ne nur por tiu agado kunlaboras asocioj en Francio. Ankaux
per IASI (Inter-Asociaj Seminarioj pri Informado) kune trejnigxas aktivuloj
de diversaj asocioj. IASI celas plialtigi la kvaliton de la poresperanta
varbado. Ankaux tio koncernas la duan punkton de Kampanjo 2000. Sed cxu
kontaktado kun politikaj partioj plialtigos la prestigxon de nia lingvo?

Versxajne jes, cxar multaj el niaj akceptantoj scivolegas pri nia afero.

Ne nur pro privataj kialoj, sed ankaux por enkonduki Esperanton en siajn
proprajn politikajn agadojn (t.e. legxpropono, ret-pagxoj, artikoloj en
gazetaro, instigado de sia membraro por internaciaj kontaktoj). Cxu ni revu
pri influo al la internacia vivo? Se vere la membroj de la politikajpartioj
ekuzos Esperanton por siaj propraj diskutoj en internaciaj medioj, tiam nia
agado atingos la trian punkton de la Kampanjo 2000.

Bonvolu viziti la politikan fakon de Virtuala Esperanto-Biblioteko cxe la
retpagxo http://services.worldnet .net/esperant/politiko.html

Vincent CHARLOT
Alain FAGOT
rete: Alain.Fagot@forigu.cwi.nl

***************************************************************************

Kampanjo UEA - en Koreio
========================

La 11-an de oktobro prof. Lee Chong-Yeong, eksa prezidanto de UEA igxis
elektita prezidanto de Korea Esperanto-Asocio kun 3-jara mandato. Prof. Lee
kaj lia teamo de la nova estraro de KEA nun planas laborprogramon de koreaj
esperantistoj. La baza ideo estas lancxi "Kampanjon U.E.A.", kadre de la
Kampanjo-2000. La Kampanjo UEA celas privigli laborojn pri 1. utiligo de
Esperanto, 2. edukado de Esperanto, kaj 3. agado por Esperanto.

el ret-info

***************************************************************************

Delegita Reto sub lupeo
=======================

En 1995 ekvalidis la nova regularo pri la delegitoj de UEA. Gxia cxefa
novajxo estis la enkonduko de 3-jara oficperiodo ankaux por delegitoj,
simile al aliaj honoroficaj funkcioj en UEA. Per tio oni celis certigi kiel
eble plej efikan funkciadon de la Delegita Reto. La nova regularo ebligas
cxesigi la delegitecon de pasivaj delegitoj per simpla ne-reelekto
anstataux pli komplika proceduro de eksigo.

La Jarlibro de 1996, la unua sub la nova regularo, registris 1830
delegitojn, t.e. 336 malpli ol unu jaron pli frue. En 1998 novaj
delegitigxoj kreskigis la nombron al 1981. Kiel celite, la nova delegitaro
efektive funkcias pli glate, cxar plendoj pri neplenumitaj servopetoj
preskaux tute malaperis. Pro tio la Delegita Reto ne bezonas nun same
fundan revizion kiel lastfoje, kiam cxiu delegito devis plenigi respondilon
kaj kvazaux unuafoje kandidatigxi por la funkcio.

Pri la renovigo de la delegitecoj por la periodo 1999-2001 decidas la
cxefdelegitoj aux, kiam tiu mankas, la direktoro de la Centra Oficejo.

La renovigo estos pli-malpli auxtomata, krom en la relative malmultaj kazoj
de delegitoj, pri kiuj venis plendoj aux kiuj mem deziras retirigxi.

La Delegita Reto, la plej malnova kaj certe la plej fama servo de UEA,
bonvenigas ankaux tute novajn membrojn. Delegito povas igxi cxiu
esperantisto, kiu jam estis almenaux unu jaron individua membro de UEA.
Respondilon por farigxi delegito oni povas peti de la cxefdelegito de sia
lando aux de la Centra Oficejo.

CO de UEA

***************************************************************************

Estu bonvena Esperante
======================

Multaj urboj kutimas bonvenigi kaj adiauxi per apudvojaj tabuloj la
vizitanton. Ekde du jaroj ankaux la slovakia vilagxo Vlcany havas grandegan
tabulon (cx. 4 metran) apud la sxoseo. Danke al la aktivaj lokaj
esperantistoj kaj la malfermiteco de la urbestro Jozef Cibula la
salutteksto sur gxi - krom la lokaj slovaka kaj hungara, krome angla kaj
germana - estas legebla ankaux Esperante.

La tabulo-starigo donas modelon pri la loka agado ankaux al aliurbaj kaj
alilandaj esperantistoj.

laux inf. Ilona Seres

***************************************************************************

Averto pri monpetaj leteroj
===========================

Denove cirkulas monpetaj leteroj, ecx lukse presitaj, kies sendintoj prenis
adresojn el la Jarlibro de UEA kaj el la Kongresa Libro de UK.

Cxar multaj el la antauxaj petleteroj montrigxis trompaj, UEA konsilas ne
donaci monon al iu ajn petinto sen certigxi pri la vereco kaj honesteco de
la koncerna kazo. Estas konsilinde informi la Centran Oficejon de UEA pri
cxiuj ricevitaj petoj, por ke la CO klopodu esplori ilian seriozecon.

UEA-kontoj
----------
La petantoj ofte petas sendi monon al ilia UEA-konto. En neniu kazo UEA
konsentis pri tio. La kontosistemo de UEA ne estas banko, kiun oni rajtas
uzi por cxiu ajn celo. Gxi estas servo de UEA por siaj membroj kaj por E-
organizajxoj por faciligi pagojn, kiuj rilatas al movada agado. Por cxiu
alia celo necesas aprobo de la direktoro de la Centra Oficejo.

Nigxeriaj milionuloj
--------------------
Multaj esperantistoj ricevis ankaux proponojn el Nigxerio helpi en
transpago de enormaj sumoj kontraux granda profito. Oni nepre ignoru ilin,
cxar temas pri aktivajxoj, kiuj estas aux fantaziaj aux kontrauxlegxaj aux
ambaux.

La adresarojn de la Jarlibro kaj la Kongresa Libro oni ne rajtas uzi por
almozpetado nek por komercaj ofertoj. Cxiu misuzanto estos rifuzita kiel
individua membro kaj kongresano. Esperantistaj viktimoj de militoj kaj
naturkatastrofoj povas peti helpon de Konto Espero de UEA. Komercaj agantoj
klopodu varbi klientojn kaj partneroj per anoncoj en la eldonajxoj de UEA

Osmo Buller
gxenerala direktoro de UEA

***************************************************************************

SAT-UEA komuna kampanjo
=======================

Ankaux la dua plej granda internacia organizo Sennacieca Asocio Tutmonda,
SAT decidis partopreni la Kampanjon-2000 lancxita de UEA.

La Plenumkomitato de SAT faris proponon al UEA kune propagandi Esperanton
cxe cx. 200 porpacaj internaciaj asocioj. UEA akceptis tiun proponon, kaj
nun la 2 organizoj kune preparas prezentan dosieron pri Esperanto, la
movado kaj gxiaj cxefaj organizoj, akompanataj de kelkaj E-gazetoj
(Esperanto, Eventoj, Monato kaj Heroldo). Per la letero la celitoj estas
alvokataj "studi la eblecon" uzi la Internacian Lingvon kiel laborlingvon,
en kio nature la E-organizajxoj volonte donas helpon.

L. R.

***************************************************************************

Esperanto sen mono
==================

Se ni konsideras, ke mono estas instrumento de intersxangxo de varoj, kiu
en ideala sociordo ne devus esti trezorigebla, kaj ke E-o mem estas
idealajxo ankoraux ne suficxe uzata en niaj normalaj aktivajxoj, mi opinias
ke neniu devus pensi pri gajno de mono per Esperanto.

Evidente Esperanto, kiel cxiuj lingvoj rilatas al mono por ties funkcia
celo, sed ne estas moncela. Cxar Esperanto ankoraux, kiel dirite, ne estas
gxenerale aplikata, gxi estas en fazo de "investado", t.e. gxi elspezigas
nin por krei tiujn eblecojn de funkciado. Ni devas informi lernigi kaj
uzigi gxin, do tio kostas. Ni apartenas al kluboj, asocioj, abonas revuojn,
iras al kongresoj, sekve multe da mono envolvigxas en tiujn procedojn.

Alia karakterizo de la esperantistoj estas, ke ili apartenas al malricxa
mikrosocio de idealistoj. La homoj kiuj nur celas gajni multan monon (kies
idealo estas la mono mem) tute ne havas intereson pri Esperanto. Povas
ekzisti esceptoj kiel Internacia Rondo Esperantista Prospero sub gvido de
ambicia Zinovi Kurolap (vidu la lastan kovrilon de UEA-jarlibro 1997).
Ankaux TAKE - La Domo, IKEF k.a. volas prave apliki Esperanton por komercaj
celoj. Temas pli pri praktikado ol celo al pergajno kvankam la
esperantistoj ne devus esti tiom stultaj, ke ili ne kunigas la utilajxojn
al la agrablajxoj.

Pri eldonado, kiun mi persone praktikas je perdita fonduso, cxar mi donacas
la tuton je dispono de la Esperanto-Asocioj, mi ne kredas ke iu sukcesas
havi profiton. Cxu Kribo kun "Lauxte" kaj la brosxuroj eblas aux povas havi
ioman profiton? Same cxu Bays el "Fonto" kun tiuj belegaj literaturajxoj en
merkato, kiu statistike indikas ecx ne 300 acxetantojn por cxiu verko,
povas atingi plusvaloron? Profiton povas doni nur gravaj eldonajxoj kiel
PIV aux bonaj lernolibroj kiel la fenomeno "Gerda malaperis" de Claude
Piron.

Ni scias, ke asocioj kun malpli ol 1000 membroj, kiuj ankoraux pagas tiujn
mizerajn kotizojn kaj kun pli kaj pli da peno pro la "ekonomika hororo" ne
povas pagi dungitan oficiston por la mastrumado de la asocio. Tipa ekzemplo
estas SAT mem, kiu malfacile eltenas la sxargxon. Sekve ne estas dubo, ke
la bonvola kaj volontula Esperanto-laboro ne povas esti pagata en la nuna
strukturo de la asocioj. Estas tamen bone atenti, ke bonvolemo kaj
volontemo ne senigas la koncernatojn je kompetento kaj kapablo, kaj mi dum
mia tuta vivo baraktis por ke homo kiu akceptas taskojn kaj postenojn havu
la devon efike, zorge plenumi tiujn taskojn sendepende de pago aux aliaj
avantagxoj; temas pri la minimuma kohereco kaj honesteco, ankaux cxe
idealistoj.

La sperto montras, ke kursoj cxu senpagaj cxu pagitaj gxuas la saman sorton
flanke de la lernantoj. Nur restas tiuj, kiuj estas trafitaj de la mikrobo,
Esperanto-idealo kun konvinko.

Garolo, Brazilio
el Lauxte, n-ro 133

***************************************************************************

Rekordo
=======

La Montpeliera libroservo havis same imponajn dimensiojn kiel la UK mem.
Gxiaj vendoj superis 120 mil guldenojn. Almenaux en la 80-aj kaj 90-aj
jaroj neniu alia kongresa libroservo enspezis same multe. En la 90-aj jaroj
la plej grandan debiton, "nur" 80 mil NLG. oni atingis en la Praga UK. En
Montpeliero la kongresanoj uzis averagxe 40 NLG por acxetoj en la
libroservo.

La efiko de la UK-oj al la E-merkato ne limigxas nur al la vendado dum la
kongresa semajno. La kongresa libroservo estas samtempe la plej ampleksa
cxiujara foiro de Esperanto-libroj. Klientoj povas konatigxi dum gxi kun
libroj kaj aliaj varoj, kiujn ili ofte acxetas nur reveninte hejmen.

La Montpeliera libroservo proponis preskaux 1500 titolojn. Estas
rimarkinde, ke laux la vendokvanto la pinton okupis la prelegkolekto de la
kongresa universitato per siaj 176 venditaj ekzempleroj!

***************************************************************************

Unu horo: 85 mil spektantoj
===========================

En la nederlanda tutlanda TV-programo la 8-an de novembro estis elsendita
unuhora dokumentara filmo "De nalatenschap van doctor Esperanto" ("La
postlasajxo de doktoro Esperanto").

Interplekte kun malnovaj filmfragmentoj - Zamenhofa parolado, Andreo Cseh
amas-instruanto en la 30-aj jaroj, kaj E-lingvaj salutfrazoj de la
nederlanda cxefministro Willem Drees al la UK en Haarlem (1954) -, oni
paroligis veteranajn e-istojn kaj UEA-oficistojn.

La filmo, kies auxtoroj elektis kunmunti la sekvencojn tute sen komentoj
kaj klarigoj, tiel ke cxiuj kaj cxio parolis por si mem, donis honestan
bildon pri (parto de) la nederlanda E-movado. Kritikisto de la jxurnalo NRC
Handelsblad jugxis la verkon "instrua kaj interesa, ame filmita".

La landa asocio Esperanto Nederland antaux 2 tagoj de la elsendo mendis
anoncojn en cxiuj gravaj tutlandaj gazetoj. Al tiu reklamo efike aldonigxis
multaj redakciaj prezent-artikoloj en la televida rubriko de la samaj
jxurnaloj kaj aliaj gazetoj, kaj kvarpagxa "kovrila" artikolo de la TV-
magazino "VPRO Gids", kiu cxi-semajne aperis ecx kun E-lingva kovrilo kaj
la porokaza titolo "VPRO Gvido".

Laux oficiala statistiko, la elsendo altiris 85 mil spektantojn. Ene de 36
horoj post la fino de la elsendo, alvenis jam 200 informpetoj al la
kontaktadreso de Esperanto Nederland.

Vizitantoj de la Centra Oficejo, CO de UEA en novembro povis spekti mem la
regitrajxon de tiu filmo.

Istvan Ertl

***************************************************************************

Batigxas la franca
==================

En la jxurnalo Le Figaro, (1-a de septembro 1997), rubriko "Figaro-ci,
Figaro-la" aperis la sekva artikolo:

La angla unuavice

"Konfirmigxas la ekmalfortigxo de la franca en la euxropaj instancoj: la
franca versio de la estonta "Traktato de Amsterdamo" (kiu estas ratifikota
en la dekkvin landoj de la Unuigxo) alvenis Parizen fine de junio, t.e.
dekon da tagoj post la regantara konferenco, plenplena je eraroj kaj
malekzaktajxoj. "Cxiukaze, unuavice validas la angla versio de la teksto",
sciigas la bruselaj instancoj."

* * *

Ni ne forgesu tion en nia argumentado, same kiel la fusxan version de la
"Traktato de Maastricht" kiun oni devis detrui. Krome se estas tiom da
eraroj en tradukita teksto, cxu vere necesas havi superan inteligentecon
por kompreni, ke samtempa tradukado (interpretado) estas farso? Iuj
politikistoj volas paroli en la propra lingvo - eble cxar placxas al ili
auxdi sin mem - sed iliaj paroloj estas ne malofte malsamaj laux senco kiam
ili eliras el la busxo la interpretistoj.

Henri Masson
esperantohm@forigu.francemultimedia.fr

***************************************************************************

Preparoj al nova EP
===================

Oni ne devas klarigi, kiel grave estus por la E-movado, se Euxroparlamento,
EP subtenus nian lingvon. Nia "frakcio" konsistas nun el cx. 120 EP-anoj,
t. e. 20 % de la reprezentantaro.

Cxar la novaj elektoj proksimigxas, Unuigxo Franca por Esperanto, UFE jam
pretigxas al la kampanjo. La konsisto de la listoj de diversaj partioj
estos sciata versxajne en marto 1999.

Claude Longue-Epee (UFE) kaj teamo cxirkaux li kontaktos unuopajn
kandidatojn el cxiuj partiaj listoj por ke ili subtenu Esperanton en EU-
parlamento post ilia elektigxo.

JEFO (la junulara sekcio de UFE), kadre de sia kampanjo al politikaj
partioj, sindikatoj kaj landskalaj asocioj, klopodos kunveni kun la
euxrolistanoj.

laux Vincent Charlot
repr. de UEA cxe Unesko
esperant@forigu.worldnet.fr

***************************************************************************

Cxu rekordo en Berlino?
=======================

Naux monatojn antaux sia komenco la 84-a Universala Kongreso de Esperanto
en Berlino (31.07-07.08.99) jam superis la definitivan nombron de
aligxintoj de multaj antauxaj UK-oj. Gxis la mezo de novembro estis
registritaj 1268 aligxintoj el 51 landoj.

Plej multe da aligxintoj estis el la kongreslando Germanio (326). Sekvas
Francio (128), Polio (106), Japanio (81), Nederio (61), Italio (50), Britio
(42), Svedio (38), Belgio (37) kaj Finnlando (34).

***************************************************************************

Afrika Gospel-grupo en Finnio
=============================

La societo "Pro Esperarto" arangxis la trian adventon, 13.12.98. volontule
pagan koncerton.

La evento estis grava kaj interesa cxar ne estis nur Esperanta evento sed
publika koncerto kie ecx "normala" koruso kantis tri E-lingvajn kantojn.

La afrika Gospel-grupo kaj la kantistoj de Uest-Orimattila prezentis
kantojn de sudaj kaj nordaj landoj. La afrikaj ritmoj kaj la movoj de la
artistoj je la kantado estis speciala okazo en tiu malgranda finna vilagxo.
La publiko (cx. 50 personoj) ege sxatis la programon kaj la arangxistoj
rekomendas tiatipan koncerton, kie ne-esperantistoj povas konatigxi kun
alia kulturo, alia lingvo kaj kun Esperanto en la praktiko.

Pro Esperarto ricevis monhelpon de la kultura komisiono de urbo Orimattila
jam en printempo kaj nun la monon ni povis uzi por vojagxkostoj de la
afrikanoj (kiuj nun logxas en Finnlando sed devenas el Angolo kaj Kongo).

Borje Eriksson / Pro Esperarto,
Keituirintie 274, FI-16510 Luhtikyla, Finnlando

***************************************************************************

Nomoj de Kalocsay
=================

Kalman Kalocsay uzis multajn plumnomojn. Kelkaj el ili (Peter Peneter,
Kopar, C. E. R. Bumy, M. Alice Pik, Allex Kay, la postmorta Ista Makler kaj
Emiano Imby) estas konataj, kaj versxajne ekzistas ankoraux nekonataj.

Amika Societo de d-ro K. Kalocsay atendas sciigon pri pliaj plumnomoj de
tiuj, kiuj povas prezenti nerefuteblan pruvon, kaj premios la malkovranton
per valora libro. Adreso:

p/a Ada Csiszar
Zsigmond ter 1/B, HU-1023 Budapest, Hungario

***************************************************************************

"JAM" bezonas vin!!
===================

Dum la pasinta KS (Komuna Seminario inter Cxinio, Koreio kaj Japanio) en
Pekino, en julio 1998, deko da junuloj el la tri landoj diskutis kiel
plivigligi kaj plibonigi la junularan E-movadon en kaj inter la tri landoj.
La rezulto estas la fondigxo de "JAM", Junulara Azia Movado.

JAM estas reto de aktivaj E-junuloj en Azio kiuj interesigxas pri
kunlaboroj: pli bona informado al kaj ekster la E-komunumo, realigado de
interesaj projektoj. Se vi estas juna aux aktiva en la junulara agado kaj
volas utiligi E-on kiel komunan lingvon inter ni, farigxu JAM-ano!

Interesitoj bv. anonci sin al Bill Mak (adreso sube) gxis la 1-a de marto
1999. Ni petas

1. Prezentu vin koncize (nomo/adreso/agxo/fako, ktp)
2. Kiamaniere vi aktivas, kian postenon vi okupas en iu ajn E-organizo
3. Ajnaj komentoj aux sugestoj al JAM.

JAM-anoj havos la respondecon kune verki la statuton de JAM kaj elektos
JAM-komisionanojn dum la sekva KS okazonta en Japanio (somere 1999).

Bill Mak
P.O. Box 92153, T.S.T. Post Office, Kowloon, Hong Kong.
Rete: jam@forigu.esperanto.nu

***************************************************************************

Mondo sen interpretistoj
========================

"La mondo sen interpretistoj" estis nomo de ekspozicio, arangxita en la
urba muzeo en Ceska Trebova en septembro.

Krom informi pri la ekzisto kaj urba historio de E-o, gxi estis dedicxita
ankaux al la praktika uzado de Esperanto precipe cxe la fervojo kaj al la
agado de la loka E-rondeto.

La ekspozicio plenumis sian taskon, gxi montris al la vizitantoj, ke
Esperanto ne estas nur amuzo, sed havas sian praktikan, utilan uzadon,
ricxan mondpasintecon kaj esperon pri estonto.

Jiri Pistora

***************************************************************************

MALLONGE
////////

Cxe UEA aperis la Esperanta eldono de "Homaj rajtoj: demandoj kaj
respondoj". La angla originalo de tiu cxi libro, verkita de Leah Levin,
elstara brita specialisto pri homaj rajtoj estis unuafoje eldonita de
Unesko en 1981. Antaux ol aperi en Esperanto, tiu populara libro estis
eldonita en 16 aliaj lingvoj.

* * *

Esperanto Halkaro Tili - estas la titolo de la unua (!) uzbeklingva
lernolibro, verkita de A. Ionesov kaj B. Habibov, eldonita de la moskva
eldonejo Impeto kun financa subteno de la Fondajxo Carson. La libro enhavas
12-lecionojn, dudirektajn vortarojn kaj konversacian parton entute en 230
pagxoj.

* * *

Jxus aperis la praktika Esperanto-agendo "LA JARO", kiu ne nur ricevis
novan vestajxon, sed ankaux plisveltigxis, ke gxi pli facile eniru la
posxon. La eldonejo Flandra E-Ligo, FEL decidis ne plu aldoni la
enciklopedian parton "La landoj de la tero" - gxi aperos kiel aparta
eldonajxo antauxvideble en junio '99. La eldonajxo "LA JARO" (10x15 cm, 180
BEF=4,5 EUR) estas havebla cxe Flandra E-Ligo, Frankrijklei 140, BE-2000
Antwerpen, Belgio, rete: butiko@forigu.fel.agoranet.be

* * *

D-ro Saheb Zamani - Honora membro de UEA - en Alameh Tabatabai universitato
de Tehran la 27-an de nov. prelegis pri E-o. La prelegon arangxis s-ro
Abdollah Hakimnejhad vicprezidanto de IREJO. Laux la konsento de la
universitata estraro oni planas arangxi E-kursojn tie. -inf: irejo@forigu.neda.net

* * *

Okaze de la Tago de E-libro kaj Zamenhof-tago Kroata Esperantista-Unuigxo,
KEU kunlabore kun la filatela societo "S. Gabrijel" prizorgis porokazan
dulingvan stampon kaj koverton - kun portreto de Zamenhof. Projektis: Z.
Svetlicxicx.

***************************************************************************

OPINIOJ
///////

Nekonsciita lingva koloniigo
============================

La 14-an de novembro '98 okazis anglalingva diskutado en auxstria Blue
Danube Radio pri la temo: "La angla, cxu (!) la internacia lingvo?".
Diskutis a) la prezidanto de la viena lerneja konsilantaro; b) universitata
profesoro (politologo) el Innsbruck; c) reprezentanto de la auxstri-usona
asocio kaj d) parolisto de la industrio. La argumentoj:

a) Por la auxstriaj infanoj, kiuj lernas la anglan baldaux ekde la unua
lernojaro (sesa vivojaro), la angla estas ne fremdlingvo, cxar ili jam
konas 100 vortojn pere de komputiloj kaj interreto. Ili amas ("love") lerni
la anglan. La avantagxo de la angla estas, ke gxi ne estas iu artefarita
lingvo kiel Esperanto.

b) La angla estas la "lingua franca" kaj igxis jam Esperanto. En Hindio
kelkaj centmilionoj parolas flue la anglan.

c) Sukceso de la interreto bazigxas sur la angla kiel komuna lingvo. Tamen
la popoloj povas konservi sian kulturan identecon.

d) La infanoj avidas lerni la anglan. Se ili ne disponas pri lingvo, ili ne
kapablas kompreni mekanismojn. Se la lingvo estas limigita, ankaux la
pensado estas limigita. Tio povus esti problemo.

Dum la posta diskutado parolis inter aliaj universitata profesoro d-ro
Maitzen, reprezentanto de UEA cxe la Unuigxintaj Nacioj en Vieno. Li
kritikis, ke la diskutantoj havas cxiuj la saman opinion favoran al la
angla - do ne temas pri diskuto. La angla estas esprimo de la komandado de
Usono, do ne lingvo de frateco kaj egaleco. Pakistano asertis, ke en Hindio
malpli ol unu elcento parolas la anglan flue.

Irlandano plendis, ke la angla preskaux neniigis la irlandan lingvon.

inf: Mag. Walter Klag

***************************************************************************

INSTRUADO, ILEI
///////////////

1 kreditoj el 75
================

En la liceo de Enontekio en la finnlanda Laponio post la 38-hora E-kurso 15
studentoj (16-18 jaraj) faris ekzamenon kaj ricevis 1 krediton el la 75
devigaj, preskribitaj por trapasi la liceon. Kontaktadreso de la
instruisto:

Pekka Valimaki,
LV-Asema C, SF-99400 Enontekio, Finnlando
Rete: isopekka@forigu.freenet.hut.fi

***************************************************************************

Kompilu ekzercojn!
==================

En la Pedagogia Eksperimentejo de Tria Roma Universitato ni estas
konstruantaj Lingvan Interretan Laborejon (LIL) por trejni la lingvajn
kapablojn de E-instruistoj kaj uzi gxin eventuale ankaux por aliaj celoj
(ekz. projekto Interkulturo).

Nun ni planas la strukturon de la studmaterialoj: ekzerco-tipojn kaj pri la
parola kaj pri la skriba lingvo. Temas interalie pri teksto-kompreno,
priskribado de bildo, diktado, teksto-kompletigo, sintaksa transformado
ktp. Por cxiu ekzerco-tipo ni mem pretigos kelkajn prototipojn por provi la
sistemon.

Por satigi la instruan kaj komputan strukturon de LIL, ni bezonas tauxgan
nombron da aliaj divers-nivelaj lingvaj ekzercoj.

Cxu trovigxas kunlaboremuloj, kapablaj pretigi ekzercojn laux donita
modelo? Rimarkindas, ke la tuta enhavo de LIL estas Esperantlingva, tial ne
gravas la denaska lingvo de la ekzerc-auxtoroj. Ecx male: bonvenas
alilandaj kontribuoj.

Por tia kunlaboro, retposxta kontakteblo estas utila, sed ne nepras.

Mauxro La Torre
Terza Universita' di Roma, via del C. Pretorio 20, IT-00185 Roma, Italio
Rete: m.latorre@forigu.uniroma3.it

***************************************************************************

        La kursgvidantoj, instruistoj grandparte respondecas, ke la
       kursanoj restu en la movado ankaux post la fino de la studado!

            Zorgu pri tio, ke ili abonu iun internacian gazeton
                       jam en la dauxro de la kurso!

***************************************************************************

KONKURSOJ
/////////

50-aj Belartaj Konkursoj
========================

Jam por la 50-a fojo invitas UEA al partopreno en la Belartaj Konkursoj. El
la iniciato de Reto Rossetti kreskis la plej prestigxa kaj plej longedauxra
arta konkurso en Esperanto, kies unuaj diplomoj estis transdonitaj en la
Pariza UK en 1950. La scenejon por la ora jubileo donos la 84-a UK en
Berlino. Post tio UEA planas eldoni antologion de la plej reprezentaj
verkoj el la 50-jara rikolto de la Konkursoj.

Partopreno en la Konkursoj estas libera al cxiuj kaj ne ligita al
partopreno en la UK. La konkursajxoj devas esti novaj kaj, escepte de la
infanlibroj, antauxe ne publikigitaj. Krome validas jenaj kondicxoj:

1. Poezio: Maksimuma longo ne fiksita. Tri premioj.

2. Prozo: Maksimuma longo 200x65 tajpospacoj. Tri premioj.

3. Teatrajxo: Maksimuma longo ne fiksita. Tri premioj.

4. Eseo: Teme ligita kun Esperanto aux kun la temo de la UK: "Tutmondigxo:
   sxancoj por paco?". Premio "Luigi Minnaja" kaj du aliaj premioj.

5. Kanto: Teksto kaj melodioj povas esti de malsamaj auxtoroj. Premio "An-
   Song-san" kaj du aliaj premioj.

6. Videofilmo: Teme ligita kun E-o aux kun la kongresa temo (vd. Eseo).
   Dauxro 15-60 minutoj. Sistemo VHS/PAL. Tri premioj.

7. Infanlibro de la Jaro: Originala aux tradukita libro (alia ol
   lernolibro), presforme aperinta en 1998. Unu premio.

Oni rajtas sendi maksimume tri konkursajxojn por sama brancxo. Por poezio,
prozo, teatrajxo, eseo kaj kanto oni sendu ilin en kvar ekzempleroj; por la
infanlibra brancxo en tri ekzempleroj. Cxiuj alvenu plej laste la 31-an de
marto 1999. Por la videa brancxo oni sendu po unu ekzempleron gxis la 1-a
de julio 1999. Cxion oni sendu al:

Belartaj Konkursoj de UEA, Nieuwe Binnenweg 176, NL-3015 BJ Rotterdam,
Nederlando.

La konkursajxoj (krom videofilmoj kaj infanlibroj) estu pseuxdonimaj. La
vera nomo kaj adreso estu en aparta koverto. Se eble, oni aldonu 5
internaciajn respondkuponojn por cxiu brancxo, en kiu oni konkursas.

Premioj
-------
1-a premio: 420 NLG, 2-a premio: 294 NLG, 3-a premio: 168 NLG. Premio "Nova
Talento" (por la plej bona konkursanto neniam premiita) 294 NLG. Infanlibro
de la Jaro: 882 NLG.

Publikigo: La rajto je la unua presigo de la premiitaj verkoj apartenas al
UEA, kiu ankaux poste rajtos aperigi ilin senpage en antologio de la
Konkursoj.

Plena regularo estas havebla kontraux unu respondkupono cxe UEA:

perposxte: Nieuwe Binnenweg 176, NL-3015 BJ Rotterdam, Nederlando
retposxte: uea@forigu.inter.nl.net
kaj trovebla cxe: http://www.hungary.net/esperanto/

***************************************************************************

RADIO
/////

Esperanta retradio!
===================

Dum vizito cxe Pola Radio ekestis la ideo registri satelitan elsendon de
Pola Radio, konverti gxin al Real Audio kaj disponigi gxin en la reto.
Fakte cxiu esperantisto, kiu posedas satelitan ricevilon kaj interretan
komputilon povus fari tion, kaj mi ankaux kore invitas partopreni en tiu
cxi iniciato.

Vi trovos la unuan tian programon cxe la retpagxo:
                                   http://members.xoom.com/aldone/retradio

Bonvolu raporti al mi pri la elsendo kaj skribi, cxu vi sxatus partopreni
en la iniciato.

Esperanta Retradio funkcias! Iru al: http://start.at/retradio/

Anton Oberndorfer, Auxstrio
aldone@forigu.hotmail.com

***************************************************************************

INTERESE
////////

ESPERANTO NE EKZISTAS!
======================

La 4-an de auxgusto 1998 aperis en la germanlingva gazeto "Dolomiten" (Suda
Tirolo, Italio, dolomiten@forigu.athesia.it) artikolo "Bereicherung aus dem
Vergleich" (Ricxigxo per komparo).

Temas pri seminario okazinta en Portoroz, Slovenio, kiun okazigis la
Pedagogia Instituto Graz (Stirio, Auxstrio). Mallonge oni diskutis pri la
"internacia unueca lingvo Esperanto": "Gvidantaj (tiel!) lingvistoj
avertis, ke Esperanto komencas je la iluzio, ke la homoj lernos artefaritan
lingvon, kiu nenie estas popola, komuna, armea aux ekonomia lingvo. Kaj
tial tio estus ne solvo."

Walter KLAG, Vieno, Auxstrio
klag.esperanto@forigu.online.edvg.co.at

***************************************************************************

Komputila viruso: Esperanto
===========================

La komputilaj "virusoj" fakte estas malgrandaj programoj, kiuj mem
disvastigxas en la komputilo kaj depende de la volo de siaj programistoj
povas kauxzi diversajn problemojn por la komputil-uzanto, foje ecx povas
malfunkciigi la tutan sistemon.

En komenco de '98 pluraj komputteknikaj fakrevuoj raportis pri viruso
"Esperanto", kiu povas infekti programojn de diversaj komputilsistemoj.
Gxis nun ne ekzistis virusoj, kiuj povus disvastigxi kaj funkcii en
diversaj operaciaj sistemoj (DOS, Windows 95/98/NT kaj Macintosh), estis
nur iuj kiuj kapablis "vivi" en sistemoj, bazigxantaj sur Intel-procesiloj
- aux en Macintosh.

La viruso Esperanto povas ataki la COM kaj EXE-dosierojn de DOS, NE-
programojn de Windows kaj la PE-programojn de Win-95/NT, samtempe gxi estas
vivkapabla ankaux en Macintosh, kie gxi infektas cxiujn programojn kaj
plurajn sistem-dosierojn.

La transplatforma infektado okazas, se iun DOS-programon iu funkciigas en
Macintosh per DOS-emulilo, tiel ekvivigxas pura Mac-viruso, kiu jam simple
disvastigxas en tiu sistemo.

La viruso kontrolas la sistemdaton de la komputilo, kaj se tiu estas gxuste
la 26-a de julio (dato de la apero de la unua Esperanto-libro en 1887) en
aparta fenestro aperigas la suban mesagxon:

Never mind your culture / Ne gravas via kulturo,
Esperanto will go beyond it / Esperanto preterpasxos gxin;
never mind the differences / ne gravas la diferencoj,
Esperanto will overcome them / Esperanto superos ilin.
Never mind your processor / Ne gravas via procesoro,
Esperanto will work in it / Esperanto funkcios sub gxi;
never mind your platform / Ne gravas via platformo,
Esperanto will infect it / Esperanto infektos gxin.
Now not only a human language, but also a virus...
Turning impossible into possible, Esperanto.

L. S. - surbaze de Uj Alaplap 2/1998

***************************************************************************

La angla farigxas gxena en Svisio

"No problem!"
=============

Laux informo aperinta en Ouest-France (13.11.97), la pli kaj pli forta
premo de la angla maltrankviligas la registaron de Berno.

Fresxdata kampanjo pri prevento de trafikakcidentoj okazis nur en la angla:
"No drinks, no drugs, no problem". Konferenco de la kantonaj direktoroj de
publika instruado jxus memorigis, ke en svisaj lernejoj kiel dua lingvo
devas esti instruata ne la angla, sed unu el la kvar naciaj lingvoj. La
gazeto enkondukis tiun informon iom humure: "Klacxuloj asertas, ke se la
sep milionoj da svisoj akordigxas, tio estas pro tio, cxar danke al siaj
kvar naciaj lingvoj (germana, franca, itala kaj romancxa), ili ne
interkomprenigxas."

Henri Masson
esperantohm@forigu.francemultimedia.fr

***************************************************************************

ANONCETOJ
/////////

Nekomercaj anoncetoj de abonantoj estas senpagaj!
=================================================

Bona studentino sercxas laboron en E-a familio eksterlande, dum la someraj
ferioj en 1999 aux en la posta jaro kiel prizorganto de infanoj aux
maljunaj personoj. Mi havas praktikon. Aneta Krata, ul. Slepa 6, PL-63421
Przygodzice, Polio.

* * *

TAKE - LA DOMO (Tutmonda Asocio de Konstruistoj Esperantistaj) sercxas
samideanojn parolantajn la francan lingvon, kiuj akceptus enkomputiligi kaj
samtempe lingve korekti tekstojn en la franca lingvo kaj en Esperanto por
la asocio. Ideoj kaj materialo ekzistas, sed mankas la tajpemuloj!
Kontaktu: TAKE-LA DOMO RN 83, FR-68920 Wintzenheim, Francio. Fakso:
+33-3-89775256, rete: take.ladomo@forigu.wanadoo.fr

* * *

La 22-an de majo '99 la E-Klubo de Prostejov, Cxehio festos sian
90-jarigxon per letervespero. Ni garantias respondon al cxiu alskribo! La
leteroj estos lauxtlegataj kaj poste ekspoziciataj en la urba muzeo.
Bonvolu ankaux vi skribu al: Esperanto-klubo, Husovo nam. 85, CZ-79601
Prostejov, Cxehio.

***************************************************************************

KORESPONDi DEZIRAS
//////////////////

Mi estas 35-jara finna frauxlo. Lauxprofesie mi estas librotenisto. Mi
volas korespondi kun hungaraj gejunuloj pri diversaj temoj. Mi respondos
certe al cxiuj. Seppo Pietilainen, Mannerheimink. 25 A75, SF-06/00 Porvoo,
Finnlando.

14 dekjaraj infanoj volus korespondi. Usanova Svetlana RU-150057 Jaroslavl,
pr. Matrosova 11a/18 Rusio.

Mi estas 46-jara virino kaj mi volus korespondi kun diverslandanoj.
Elzbieta Solak str. Kollataja 19/7, PL-45064 Opole, Polio.

Emerita fluginstruktoro deziras korespondi tutmonde pri aviadiloj,
aviadilmodeloj kaj antikvaj auxtomobiloj. Celso Fonseca Jr., Rua do
Tiradentes 1183, BR-13215-371 Jundiai SP, Brazilio.

***************************************************************************
***************************************************************************

EVENTOJ, n-ro 159, 1/januaro-99
Internacia sendependa gazeto pri la Esperanto-movado
en kunlaboraj rilatoj al Hungara E-Asocio.
Reg.nr: B/TSZL/85/1991. ISSN 01215-959 X
Eldonas LINGVO-Studio kaj Kultura Esperanto-Asocio.
H-1675 Budapest, pf. 87.
Tel./fakso: +36-1-2828885. Internet: eventoj@forigu.esperanto.org
Aperas dusemajne.
Respondeca eldonanto kaj cxefredaktoro: Laszlo Szilvasi.
Oficejaj kunlaborantoj: Istvan Meszaros, Laszlo Radacsy.
La redakcio ne nepre konsentas pri la enhavo de unuopaj artikoloj, 
kaj ne respondecas pri la anonc-enhavoj.
Abonkotizo: 74 NLG (aere 86 NLG) al la UEA-kodo ELLS-S.

***************************************************************************
***************************************************************************