Retposxta versio de Eventoj 117 - 1/januaro '97
***********************************************


Esperanto en 1996
=================

En  1996  estis  speciale  fruktodonaj rilatoj inter esperantistoj kaj
internaciaj organizajxoj. Iuj kredis vidi la komencon de nova epoko en
la  rilatoj  kun  Unesko. Esperantistoj partoprenis kaj en la junulara
konferenco  de  Unesko kaj en gxia gxenerala konferenco de NRO-oj, kaj
Esperanto  rolis en kelkaj referajxoj dum la Konferenco pri Lingvo kaj
Komunikado,  kunauxspiciita  de  Unesko,  pri  la  temo  "Lingvoj  kaj
tutmonda edukado".

Eminentuloj de Unesko kaj UN partoprenis apud specialistoj pri lingvaj
rajtoj  kaj  lingvopolitiko  ankaux  en la Nitobe-seminario, seminario
organizita  kadre  de la Universala Kongreso de Esperanto en Prago pri
la  temo  "Lingvo  por  internaciaj  paco  kaj  demokratio".  Cxi  tiu
seminario  estis  omagxo  al  la historia vizito de d-ro Nitobe Inazo,
asista  gxenerala  sekretario  de  la Ligo de Nacioj, al la Universala
Kongreso  de  Esperanto okazinta en la sama urbo precize 75 jarojn pli
frue.  (La  tre  favora  raporto de Nitobe ne kondukis en tiu epoko al
subteno  de  Esperanto  fare  de  la  Ligo  de  Nacioj  cxefe  pro  la
kontrauxstaro de la franca registaro.)

Esperantistoj  kontribuis  ankaux  al  la Monda Konferenco pri Lingvaj
Rajtoj,  iniciatita de la verkista organizajxo PEN Internacia, kie ili
povis  atentigi,  ke  Lingvaj  Rajtoj  aplikigxu  ankaux  al la multaj
lingvoj sen teritorio.

La  Esperanto-movadon  karakterizas  granda  diverseco en la celoj kaj
opinioj  de  gxiaj  subtenantoj,  sed okazis en 1996 tre sukcesa provo
resumi  gxiajn  principojn  en  konciza  dokumento.  La  "Manifesto de
Prago",   kiu  trovis  la  aprobon  de  jam  miloj  da  esperantistoj,
priskribas la celojn de la Esperanto-movado sub la titoloj Demokratio,
Transnacia  edukado,  Pedagogia efikeco, Plurlingveco, Lingvaj rajtoj,
Lingva  diverseco,  kaj  Homa  emancipigxo. Oni invitas al cxiu unuopa
organizajxo  kaj homo aligxi al la strebado. La teksto de la Manifesto
de  Prago  estas  tradukita al diversaj naciaj lingvoj kaj diskonigita
tra la landaj Esperanto-asocioj kaj la komputila reto.

En  1996  plu  kreskis  la nombro de membroj de la Euxropa Parlamento,
kiuj  subtenas  eventualan uzadon de Esperanto por helpi al solvado de
la lingva problemaro en Euxropa Unio. Esprimis sian subtenon jam 85 el
la 626 deputitoj.

En  pluraj  universitatoj  komencigxis  novaj  kursoj  pri  Esperanto.
Esperanton oni instruis la unuan fojon en la Universitatoj de Valencio
kaj  Havano,  en  Sieno (Italio) oni starigis universitatan kurson pri
Esperanto  cxefe por instruistoj en italaj lernejoj, kaj la Esperanto-
fako  de  la  Universitato  ELTE  en  Budapesxto ofertis, jam la trian
fojon,    sian    trijaran    internacian   korespondan   kurson   pri
interlingvistiko kaj esperantologio, kiu pretigos siajn studentojn por
posta doktorigxo.

La  pli  ol  3000 partoprenantoj de la cxi-jara Universala Kongreso de
Esperanto,   en   Prago   en  julio,  havis  sian  propran  "kongresan
universitaton"  kun prelegoj pri diversaj sciencaj fakoj. Cxi-jare oni
unuafoje  bonvenigis  nobelpremiiton  inter  la  prelegantoj: Reinhard
Selten,  kiu  ricevis  nobelpremion  pro  ekonomio  en  1994, prelegis
popularige  pri  sia  propra  fako ludoteorio. Poste li gvidis okhoran
kurson  pri  ludoteorio,  kiun  kunorganizis Akademio Internacia de la
Sciencoj  (AIS).  AIS,  kiu festis en 1995 kaj sian 10-jarigxon kaj la
aligxon  de  la 1000-a membro de sia Internacia Scienca Kolegio, celas
per  Esperanto  plibonigi  la internacian sciencan komunikadon. Gxiajn
celojn  aprobas  interalie  Mihail Gorbacxov, kiu en septembro cxijare
anoncis sian kunlaboron kiel honora profesoro.

Krom  la  tre  sukcesa  Universala  Kongreso en Prago oni povas aparte
mencii   el   la   centoj  da  Esperanto-renkontigxoj  en  1996  -  de
skisemajnfinoj  en  Svisio  gxis studsesioj en Slovakio, de seminarioj
pri  ekologio  gxis seminarioj pri financado - la Infanan Kongreseton,
kiu  okazis  samtempe kun la Universala Kongreso, kaj kiun partoprenis
59  Esperanto-parolantaj  infanoj.  Gxin sekvis la 18-a Renkontigxo de
Esperantistaj  Familioj,  al  kiuj  venis 26 familioj el 15 landoj. La
tradicie  forta  Esperanto-movado  en  Cxinio  gastigis la Unuan Azian
Kongreson  en  Sxanhajo,  kun  584  partoprenintoj,  por heroldi novan
tradicion  de tiukontinentaj kongresoj, dum la relative juna movado en
Tanzanio  invitis  jam  la  Kvaran Afrikan Kongreson. En Cxinio okazis
ankaux  la  5-a Internacia Akademia Konferenco pri Scienco kaj Tekniko
en Esperanto, en kiu partoprenis pli ol 500 sciencistoj.

Oni  festis  en 1996 la centjarigxon de Esperanta teatro, cxar en 1896
okazis  en  Smolensk la unua teatra prezento en Esperanto. Tial teatro
okupis   gravan  pozicion  en  la  artaj  programoj  de  la  cxi-jaraj
Esperanto-kongresoj.  Floris  ankaux Esperanta muziko, speciale dum la
junularaj   renkontigxoj.   Dum   la  Kultura  Esperanto-Festivalo  en
Kopenhago koncertis muzikistoj el Svedio, Francio, Zairio kaj Brazilo,
kaj  oni  vendis  tri  novajn  kompaktajn diskojn de Esperanta muziko,
inkluzive  de la dua volumo de Vinilkosmo-kompil', kiu kunigas kantojn
en Esperanto, plejparte rokajn, de 20 diversaj grupoj.

Oni  pli  kaj  pli auxdas hodiaux pri la komunikaj ebloj de Interreto.
Esperantistoj  ne  postrestas en sia aplikado de la reto. Gxis la fino
de  1996  jam  250  Esperantaj  organizoj  kaj  gazetoj  reklamis sian
retadreson,  kaj  dekoj  havas siajn proprajn TTT-pagxojn. La magazino
MONATO,  internacia  magazino  pri  politiko,  ekonomio  kaj  kulturo,
disponigas  en  siaj  TTT-pagxoj  elekton  el  siaj  artikoloj, kaj la
dusemajna gazeto EVENTOJ, kies 100-a numero aperis en aprilo, anoncis,
ke  baldaux  aperos  ankaux  retposxta  eldono. Inter la miloj da TTT-
pagxoj  en  Esperanto (Flandra Esperanto-Ligo sola ofertas pli ol 1 MB
da  informoj kun propra sercxilo) oni povas trovi interalie kalendaron
de  Esperanto-renkontigxoj,  horarojn de Esperanto-programoj en radio,
librokatalogojn, grandajn verkojn pri gramatiko kaj komputiko, multajn
literaturajn  verkojn,  informojn  pri Esperanta muziko, katalogojn de
Esperanto-bibliotekoj, la Esperantan hejmpagxon de japana sake-farejo,
informojn pri Esperanto en diversaj naciaj lingvoj, kaj ecx pagxon pri
la  aktorino  Sandra  Bullock,  kun bildoj. Por helpi al esperantistoj
krei  siajn  proprajn  TTT-pagxojn  aperis  jam  du  kursoj  pri  HTML
(libroforme  kaj  en  TTT),  kaj Esperanto-kurso por portugallingvanoj
aldonigxis  al  la  listo de Esperanto-kursoj en la reto. Kun la novaj
teknikaj  ebloj  komuniki  elektronike kun la tuta mondo sentigxas des
pli  la  lingvoproblemo,  do  la komputila reto estas fekunda tero por
Esperanto.

Inter  la  centoj  da novaj libroj de 1996 oni povas mencii du novajn,
grandajn   vortarojn,  hungara-Esperanta  kaj  itala-Esperanta,  novan
posxformatan  eldonon  de  Pasporta  Servo kun adresoj en 68 landoj de
esperantistoj bonvenigantaj Esperanto-parolantajn gastojn, Esperantajn
tradukojn de "La sercxado de la perfekta lingvo" de Umberto Eco kaj la
dramo  "Auxdienco"  de  Vaclav Havel, kiu estis Alta Protektanto de la
Universala  Kongreso  en Prago, kaj jam la 5-an volumon de Asteriks en
Esperanto.

En  1996  la Esperanto-movado gratulis interalie al Zsuzsa Polgar, kiu
igxis  en  februaro  virina  mondcxampiono  pri  sxako,  kaj kies tuta
familio  parolas  Esperanton,  al  Ralf  Gion Frohlich, aktivulo en la
junulara  esperantista movado, kiu elektigxis en marto kiel prezidanto
de Euxropa Kunordiga Buroo de Internaciaj Junularaj Organizoj, al Nora
Moerbeek,  kiu en aprilo ricevis sxtatan ordenon pro sia agado en Ligo
Internacia  de  Blindaj  Esperantistoj,  kaj al Reza Kheir-khah, irana
esperantisto,   kiu   en   junio   atingis   bonan   lokon  en  japana
prelegkonkurso per sia prelego pri "Azio kaj la komuna lingvo".

Edmund Grimley Evans


Rim:  Cxi  tiu  artikolo eble estas utila por nacilingva informado. Vi
rajtas  traduki  kaj adapti gxin por tia uzo, sed bonvole menciu "Laux
artikolo  de Edmund Grimley Evans en Eventoj". Bonvole informu min pri
via  uzo  kaj,  se  eble,  donu  al mi la tradukon en formo tauxga por
enretigo.  Cxe  la  komenco  de  cxi  tiu  pagxo estas listo de la jam
ekzistantaj tradukoj/adaptoj.

La adreso de cxi tiu pagxo estas:
http://www.cl.cam.ac.uk/users/etg10/ 1996.html


**********************************************************************


Alvoko al infanoj
=================

->  Plej  junaj membroj de Kroata Esperantista Unuigxo, kursanoj en la
bazlernejoj  okaze  de Kristnasko kaj Novjaro direktas cxi mesagxon al
siaj samagxuloj tra la mondo.


Karaj samagxuloj,
-----------------

Pluraj  samagxuloj en nia lando suferis dum la militaj jaroj. Infanoj,
kiuj  restis sen patroj, hejmoj, parencoj, plej bone scias kaj memoras
la terurajxon nomata milito.

Ni ne deziras, ke iu ajn en la mondo plu suferu pro gxi.

Ankaux ni ne deziras militon en niaj ludoj, ni ne deziras "militkapti"
kaj  "mortigi"  niajn  amikojn  dum  niaj  ludoj. Ni deziras pacon dum
ludado, pacon en la mondo.

Ni invitas vin, ke ankaux vi forjxetu militludilojn!

Samagxuloj!
-----------

Ni  kune invitu niajn gepatrojn, ke ili pli da tempo pasigu kun ni, ke
ili  ne  provu  acxeti  amon donacante militludilojn. Ili ebligu al ni
pacan  kaj  senzorgan infanagxon dum kiu ni povus ekkoni kulturajn kaj
naturajn belojn de niaj kaj aliaj landoj.

Ni  ankaux  invitu  sxtatestrojn,  ke  ili auxskultu niajn vocxojn kaj
finance malapogu tian industrion kaj vendistojn.

Finante  cxi  mesagxon,  ni  deziras al cxiuj Felicxan Kristnaskon kaj
pacan Novjaron en varmaj hejmoj kun senlima gepatra amo.

Zagrebo, decembro 1996

Junaj membroj de
Kroata Esperantista Unuigxo
perita de mbelosev@forigu.public.srce.hr


**********************************************************************


"Kasxitaj dokumentoj" de UEA
============================

->  Ankaux  en  elektronika  formo  estas  devige disponigi la usonajn
    registarajn dokumentojn, materialojn...

La  jxus  akceptita,  plej  nova  legxo, aprobita de la Usona Kongreso
(=parlamento)  devigas la sxtatajn instancojn, oficejojn aperigi siajn
dokumentojn  ankaux  en  elektronika  formo,  kaj  pli bone utiligi la
eblecojn de Internet en la diskonigo de la registaraj informoj.

La  nova  legxo  estas konsiderata kiel registara respondo al la legxo
pri  la  "libereco  de  la  informfluo". Tiuj sxangxoj plifaciligas la
akiron  de  la  registaraj  informoj  -  diris  Patrick  Leahy,  usona
senatoro.  Usonaj civitanoj havas la rajton vidi, kiel funkcias aux ne
funkcias ilia registaro.

                                                 Eltirajxo el la revuo
                        Chronicle of Higher Education (96.09.27., A30)
                                            pere de la servo "Edupage"

                             * * *

Leginte  la supran artikolon venis la demando al mia kapo: kaj kio pri
nia UEA kaj niaj landaj asocioj?

- Kiam   ni  povos  rete  atingi  la  aktualajn  dokumentojn  pri  nia
  "registaro"?  (Dokumentojn  pri  UEA,  CO,  estraroj, statuto, cxiuj
  regularoj,  kontraktoj kun fakaj asocioj, protokoloj de Komitat- kaj
  estrarkunsidoj,   estraraj   raportoj   de   la   gxisnunaj   jaroj,
  statistikajxoj,  financaj  raportoj,  ktp,  ktp.  kaj la samo pri la
  landaj asocioj...)

- Cxu  ankaux  UEA (kaj la landaj asocioj) estas same demokratiaj kiel
  la usona socio?

Laszlo Szilvasi


**********************************************************************


ORGANIZAJ DEMANDOJ
//////////////////


Lingvo-politiko de UEA
======================

Kio  estas  lingvo-politiko  de  UEA  (aux pli vaste: de la Esperanto-
komunumo) kaj cxu ni bezonas gxin?

Tion   sin  certe  demandos  ne  nur  la  legantoj  de  Informilo  por
Interlingvistoj,  IpI  (mi  atentigas  pri mia kontribuo cxi rilate en
Esperanto  5/96). Per seminario, okazinta tuj antaux la malfermo de la
UK  en  Prago, la Komitato de UEA - laux lastjara komitata rezolucio -
klopodis trakti la supran demandon.

La  idea  fono  por  la ellaboro de Esperanta lingvo-politiko estas la
fakto,  ke  dum  la  komitataj,  estraraj  kaj  aliaj  kunsidoj de UEA
gxenerale  mankas  tempo,  por  vere sisteme trakti bazajn strategiajn
problemojn, ne nur de UEA, sed de la tuta Esperanta lingvo-komunumo.

Tro  rapide  bakigxas iuj grandiozaj planoj sen vere profunda scio pri
la  necesoj  kaj  potencialoj  de  la  E-movado,  sen  analizo  de  la
neesperantistaj   situacioj.   Se   iam   donigxus   iuj  sxancoj  por
konsiderinde  fortigi  la pozicion de Esperanto, ekzistus la dangxero,
ke  simple  mankos la necesaj movadaj kondicxoj por altnivele respondi
al  la  sxancoj  (ekz.  en  Euxropa  Unio  ks).  Necesas  do multe pli
profundaj  diskutoj,  por  alveni  al  pli  bone motivita kompreno pri
neceso kaj la nunaj realaj ebloj.

Dum  la  lastaj  jaroj  la  movado  evidente  malfortigxis. Aktivajxoj
malaperas, (kvankam jes ja, foje novaj rimarkeblas). Granda aro da ili
tamen parte aux komplete dependas de unuopuloj kaj pli estas sekvoj de
individuaj intuicioj kaj preferoj ol de prioritataj necesoj. Strategie
gravaj kampoj restas nesuficxe plugitaj (ekz. altnivela faka aplikado,
terminologio,  esperantologio,  leksikografio). En aliajn oni investas
multe  da energio kaj mono, kvankam la homaj kaj financaj fortoj de la
movado ne kreskas adekvate, foje sxajne ecx sxrumpas.

Ni  do  bezonas  dauxrajn impulsojn por pli bone vidi la prioritatojn,
por esti pli bone preparitaj por la defioj de la nova jarmilo. Tial ni
havu i.a. bone ellaboritan kaj koheran lingvopolitikon.

Por almenaux komenci okupigxi iom konkrete pri la cxi-supraj temoj kaj
ankaux por ilustri la koncepton pri lingvopolitiko, la seminario, kion
sekvis cx. 90 kongresanoj, klopodis trakti 4 tem-kompleksojn:

1. Pri  bazaj  konceptoj de lingvopolitiko kaj lingvo-planado en etnaj
   lingvoj  enkonduke  prelegis prof. Humprey Tonkin, pri ekzemploj el
   la  japana  informis Yamasaki Seiko kaj pri la novhebrea prof. Amri
   Wandel.

2. La  rolon  de  planlingvaj akademioj prilumis d-ro Sergej Kuznecov,
   sekvita de d-ro Werner Bormann, kiu prezentis siajn vidpunktojn pri
   la  estonta  laboro  de  la  Akademio  de  Esperanto.  D-ro  Renato
   Corsetti,  elirinte  el siaj familio-lingvaj spertoj, atentigis pri
   la  observebl  a  kontrauxdiro inter personaj lingvaj gustoj kaj la
   oficiala lingva normo.

3. Tipologion  de  cxefaj  etnolingvaj  vortaroj  prezentis prof. John
   Wells kaj tiel al la auxskultintoj ebligis kompreni, ke multo estas
   farenda   por  pli  bone  evoluigi  la  Esperantan  leksikografion.
   Kompreneble estigxis i.a. diskuto pri la nuna reviziado de PIV.

4. Kaj  fine  Mark  Fettes  en  sia kontribuo substrekis la neceson ja
   ellabori  koheran  lingvopolitikon kaj prezentis ideojn por realigi
   gxin.

Ne  necesas  aparte  substreki, ke la kontribuoj vekis vere tre viglan
diskuton. La disponebla tempo neniel suficxis.

Estas  planite  eldoni  la materialon kaj en la estonto organizi pluan
seminarion.   Portempa   komisiono   de   la   Komitato   de  UEA  pri
lingvopolitiko  sercxas  vojojn,  kiel  estonte okupigxi pri tiu temo,
certe inkluzivante CED kaj la Akademion de Esperanto.

Detlev Blanke
el IpI 3-4/1996


**********************************************************************


OPINIOJ
///////


Dankon - sinjoro Nitobe
=======================

De  la  Simpozio  Nitobe  de  Internaciaj Organizajxoj, samkiel multaj
samideanoj,  mi posedas ekzempleron de la Nitobe-raporto al la Societo
de la Nacioj (SDN) en marto 1922.

Jam delonge, mi estis turmentita pri uzo de la formulo (N*N-1) per kiu
ni  kalkulas,  tutunue  mi,  la  nombron  de la necesaj tradukistoj en
Internaciaj Organizajxoj.

Nu! Jen, ke fragmento de tiu raporto pripensigas min. Inazo Nitobe, en
la  3-a  paragrafo, skribas pri "la demando vidpunkte de la internacia
sxparado"   kaj   invokas   profesoron   Pfaundler   (Graz)  kaj  lian
kalkulformulon, tiele skribita en la raporto: "(10 x 9)/2". Temas, por
ekzemplo,  pri  retekipado  de  tuboj  por  pneuxmatika  posxto  en 10
distriktoj  de  urbo. Tiu "(10x9)/2" tutcerte signifas por ni: (N*N-1)
dividita  per du. Verdire, estas tiu "dividitaj per du", kiu atentigas
min.  Kaj mi demandis min; "Kial?". Mi deziris scii la tutan veron pri
tiu  afero.  Mi do reuzis la saman ekzemplon por provi trovi la kialon
per   desegno.   Mi   do  strekis  unu  post  la  alian,  la  necesajn
tubliniojn...  kaj  mi kalkulis 45!: (10x9)/2 t.e. 90 dividita per du.
Kial?

Tutsimple cxar la porekzempla tubo estos dudirekten uzita: unu direkto
por sendado kaj inverse por la ricevo. Povas esti, ke, praktike, temas
pri  duobla  paralela  tubo  por  cxiu  linio, samkiel por fervojo kaj
metroo.  La  rezonado  tamen  valoras:  tradukisto dudirekten laboras,
altraduken kaj detratuken.

Poste,  sinjoro  Nitobe  kompare  indikas,  ke  tiu sistemo povas esti
anstatauxigata  per  alia, kreante centran kaj unikan distriktoficejon
(nia  Esperanto-pontolingvo),  tial  10  tuboj suficxos. Depesxo estas
sendita   de   distriktoficejo   al   centra  oficejo,  kiu,  siavice,
transsendas la depesxon al la koncerna distriktoficejo.

Dek distriktoficejoj + centra oficejo = dek tuboj anstataux 45.

Dek  naciaj  lingvoj + Esperanto-pontlingvo = 10 tradukistoj anstataux
45.

Laux  mi,  Nitobe kaj Pfaundler pravas. Ni nepre devas duone dividi la
nombrojn,  kiujn  ni  uzis  gxis  nun.  Siatempe, mi provis klarigi la
problemon  fare  de  kleraj amikoj, se ili ne plene sekvis min. Por 11
lingvoj, ili kalkulis, kaj kalkulas, 22 tradukistojn, kiam mi kalkulas
nur 11 (unu altraduko + 10 detradukoj). Eble mi malpravas. Eble Nitobe
malpravis   sekvi   profesoron  Pfaundler  kaj  lian  rezonadon.  Tiam
demonstrado nepras, cxar ne suficxas aserti: "estas tiel kaj ne alie".
Sed  se Nitobe pravas, kvankam li elmondigxas jam de 63 jaroj, tiam ni
povos danki lin. Dankegi lin por palpigi al ni la realecon.

Raymond Bore


**********************************************************************


Nitobe-seminario
================

La  Nitobe-simpozio,  organizita  de  UEA  en la kadro de la Praga UK,
havis  ankaux  lingvopolitikan  karakteron.  Gxi  havis - laux informa
letero  de  Mark  Fettes,  la  cxefa  organizanto de la simpozio - tri
celojn:

- omagxi  la  memoron  de  d-ro  Inazo  Nitobe,  la  Asista  Gxenerala
  Sekretario  de  Ligo de Nacioj, kiu mem partoprenis la 13-an UK-n en
  Prago  antaux  75  jaroj  kaj  verkis  tre favoran raporton pri siaj
  spertoj;

- ebligi  al  deko  de  nemovadaj  fakuloj pri lingvopolitiko, laux la
  imitinda  ekzemplo  de  Nitobe,  sperti  la  aktualan  funkciadon de
  Esperanto kadre de la Universala Kongreso;

- aktualigi la debatojn pri Esperanto kiel solvo por konkretaj, gravaj
  problemoj de internacia lingva komunikado.

Pri detale pri la simpozio oni povas legi en la revuo Esperanto 10/96.

el Ipi 3-4/96


**********************************************************************


ARANGxOJ
////////


"Moda Internacia Renkontigxo" - MIRO '97
========================================

Dum la lastaj 3 jaroj igxis jam modo partopreni la cxiujare alimaniere
decxifratan    MIRo-n,   kiu   cxijare   nomigxas   "Moda   Internacia
Renkontigxo".

Konforme  al sia nomo, ankaux la temo estos la modo. (Modo ne ekzistas
nur  rilate  al  vestado  kaj vestajxoj, sed ankaux apartenas al aliaj
sferoj de vivo...)

Partoprenkotizoj  de  MIRo,  okazonta  inter 21-25 de marto en Rovinj,
Kroatio  en  luksa  hotelo,  estas inter 100-150 DEM. Post la fino oni
povas  dauxrigi  la vojagxon kaj partopreni en la sekvatage komenconta
Internacia Junulara Festivalo en norda Italio.

Por pliaj informoj rigardu la TTT-pagxon
http://jagor.srce.hr/dxmalkoc/miro/miro.htm,
aux turnu vin al Kroata Esperanto-Ligo:

Amrusxeva 5/I, HR-10000 Zagreb, Kroatio
Tel.: +385-1-4810152
Rete: kamenski@forigu.cirus.dhz.hr


**********************************************************************


IREN - naturamika!
==================

Post  plurjara  pauxzo  inter  15-21  de  auxgusto  denove  okazos  la
naturamika  E-renkontigxo  IREN,  cxi  foje  jam la 26-a, en Abaliget,
cxarma ripozejo en la montaro Mecsek, je 18 km-oj de Pecs.

Tranoktado en hotelo, somerdomo aux motelo. Kotizoj inter 190-250 DEM.

Petu detalajn informojn cxe la E-societo Baranya:

pf. 98, H-7601 Pecs, Hungario
Tel: +36-72-333123


**********************************************************************


Itala invado en IS
==================

La  jxus  pasinta,  40-a  Internacia  Seminario, IS de GEJ (Germana E-
Junularo)  en  Freiburg  estis  eksterordinare granda kun siaj cx. 350
partoprenantoj.  Precipe  rimarkebla estis la cxeesto de 75-kapa itala
"invado".

Dum  la  IS  estis  reelektita ankaux la estraro de GEJ, kion ekde nun
gvidos  Marko  Naoki Lins, 23-jaragxa studento de historio el Koln. La
gxisnuna prezidanto, Ulrich Gortz, transprenis la kasistajn taskojn.

La 41-a IS okazos plej versxajne en TRaben-TRarbach.
laux "koncizepress"


**********************************************************************


Cseh-kurso en Cxehio
====================

Inter  la 24-a kaj 30-a de marto okazos Cseh-metoda kurso de Esperanto
en  Cxehio,  parte  en  Prago, parte en Brno, kun akompana turisma kaj
kultura programoj. Gxi estis unuafoje farita antaux unu jaro por grupo
de  japanoj,  kiujn  venigis en Pragon Tokia Esperanto-klubo frunte de
gesinjoroj   Ooba.   Same   kiel   pasintjare,   ankaux   cxifoje   la
cxefinstruisto estos d-ro Petro Chrdle.

La  kurso  estos  kaj  por komencantoj, kaj por progresintoj, kun eblo
mendi tranoktadon en tristelaj hoteloj aux en modestaj hoteletoj.

Pli da informoj kaj aligxiloj cxe:

Petro Chrdle,
Anglicka 878, CZ-25229 Dobrichovice,
Fakso: +42-2-9912126,
rete: chrdle@forigu.kava-pech.cz


**********************************************************************


Korea vintra kunlogxado
=======================

'97 Tutlanda Vintra Kunlogxado de Korea Esperanto-Asocio (KEA).

Dato : de la 21-a gxis la 23-a de februaro 1997.

Loko : YUSUNG Youth Hostel en la urbo Taejon.

Kotizo : senpage

Respondeculo : KIM Kiwon, sekretario de Korea Esperanto-Asocio

Por pli detalaj informoj turnu vin al KEA.

CPO Kesto 4258, KR-100-642 Seoul, Koreio
Tel./fakso: +82-2-741 1291
Rete: keast@forigu.soback.kornet.nm.kr


**********************************************************************


Naturamike en la Nigra Arbaro
=============================

La internacia feriosemajno de TANEF (Naturamikoj Esperantistaj) okazos
en  la  naturamika  domo  "Kniebis"  (Nigra  Arbaro),  je  10 km-oj de
Freudenstadt, inter 09-16 de auxgusto.

Kostoj:  inter  620-720  DEM  (inkluzivanta logxadon, mangxadon kaj la
programojn) depende de aligxperiodo kaj de TANEF-membreco.

Informoj kaj aligxiloj haveblas cxe:

Erna Doring,
pf 225, CH-4003 Basel, Svisio.


**********************************************************************


Pli frua rendevuo
=================

"En la numero 0112 vi publikigis sciigon pri internacia renkontigxo de
esperantistaj geedzaj paroj en Podebrady, Cxehio.

Okazis  sxangxo,  do  la renkontigxo okazos en tagoj 31.05-08.06. Niaj
samideanoj  konvinkis  la  urbestron  pri  la  utilo  de  E-o,  kaj li
disponigos  senpage  la  salonojn por la renkontigxo. Ankaux la banejo
mem  donos certajn rabatojn. La programo estos vere bunta, kaj jam nun
alvenas aligxiloj el diversaj landoj.

Interesa  kaj malmultekosta estos ankaux la renkontigxo de naturamikoj
apud   banejo  Kunratice  en  la  tagoj  30.05-01.06.1997.  Oni  povos
plilongigi  la  restadon.  Dormado  en  kabano,  romantika  migrado en
montaro  kaj arbaroj de Ralsko. Informas: Miloslav Jira, Mechova 8/32,
CZ-46604 Jablonec n.N. Cxehio."

Vlado Sladecxek


**********************************************************************


Kompleta monata kalendaro
=========================

La  kompleta  jara  listo  de  E-arangxoj  dauxre  aktualigata  de ni,
troveblas  en  Internet  http://www.hungary.net/esperanto/.  Korektoj,
aldonoj bonvenaj!


30.01-02.02.  7a  Jizera-Gigantmontara  Januareto, Horni Polubny. Inf:
   Jan Navratil, Masarykova 1596, CZ-415 02 Teplice, cxehio.

                             * * *

31.01-02.02.  Rusia E-Kongreso, REK '97 Moskvo. Inf: Mihail Cxertilov,
   a.k. 21, RU-143000 Odincovo-6, Rusio. Rete: era@forigu.glas.apc.org

                             * * *

03-05.02.  Konferenco:  "Lingvo-etnaj  problemoj  sur  la  postsovetia
spaco",  Moskvo. Inf: Mihail Cxertilov, a.k. 21, RU-143000 Odincovo-6,
   Rusio. Telefono kaj fakso: +7-095-2437456. Rete: era@forigu.glas.apc.org

                             * * *

13-18.02.  Praktikado kaj pedagogio, Bouresse. Inf: La Kvinpetalo, FR-
   86410 Bouresse, Francio. Tel: +33-549-428074

                             * * *

20-25.02.  Praktikado kaj pedagogio, Bouresse. Inf: La Kvinpetalo, FR-
   86410 Bouresse, Francio. Tel: +33-549-428074

                             * * *

22-23.02.  Vintraj  tagoj,  Seinajoki.  Inf:  E-Asocio  de  Finnlando,
  Pengerkatu 18 A 86, FI-00500 Helsinki Finnlando. Tel: +358-9-715538.
  Rete: tijupie@forigu.uta.fi


**********************************************************************


FAKA APLIKADO
/////////////


0-1-2 prezidantoj
=================

La  gxeneralan  jarkunvenon  de  Muzika  Esperanto-Ligo  MEL  en Prago
partoprenis 54 MEL-anoj kaj membroj de la Internacia Koruso.

En  sia  raporto  la  prezidanto  prezentis la agadon de la Ligo en la
lasta jaro. Rilate al la renovigo de la estraro, li proponis denove s-
ron  Gaines  kiel  prezidanto.  Tamen, s-ro Gaines ne cxeestis, kaj la
opinio  de  la  partoprenantoj  estis  -  pripensi  pli  serioze  tiun
problemon.

Oni  elektis  4-personan  komisionon kun la tasko trovi solvon gxis la
fino  de  la  kongreso,  tamen  neniu konsentis alpreni la postenon de
prezidanto kaj redaktoro de la bulteno "Muziko".

Finfine,  la  komisiitoj  petis  prof. Terziev dauxrigi sian agadon en
ambaux  tiuj  funkcioj.  Li konsentis, kaj la problemo estis provizore
solvita,  sed  neniu  eksciis pri tio... cxar ne suficxis la tempo por
nova MEL-kunveno.

el "Muziko" 2/96


->Rim.  David  Gaines  (gaines@forigu.peabody.  jhu.edu)  tamen akceptis esti
prezidanto  ekde  la  venonta  jaro,  sed  insistas pri apartigo de la
funkcioj prez. kaj redaktorado.

MEL  estis fondita en 1963. Organo: la bulteno Muziko, aperanta 2-foje
jare   (A-5,  tajpita  kaj  fotokopiita).  Membrokotizo:  15  USD.  La
Internacia  Koruso  ekzistas  jam  16  jarojn.  Fondis gxin entuziasma
muzikisto  Dimitrij  Terziev,  bulgara muzika pedagogo, direktisto kaj
komponisto.  La  koruso,  "kiel  fenikso"  renaskigxas  cxiam  dum  la
Universala  Kongreso, konsistante el la kongresanoj mem. La longdauxra
agado  de  D.  Terziev  estas  agnoskita per la premio Degucxi - 1966.
(vidu sur p. 6.)


**********************************************************************


-> Kiel Esperanto igxas tutsimple funkcianta internacia lingvo?


La metodo de TAKE-ESPERANTO
===========================


Kiam  komencigxis la kunlaborado kun Michel Basso, nia prezidanto, kiu
tutnature  uzas  Esperanton  por  tutmondaj komercaj kontaktoj, ankaux
lokaj  ne-esperantistaj  dubantoj  miris  pro  la multnombraj komercaj
leteroj,  faksoj  kaj  ret-mesagxoj  en  Esperanto.  Tiaj pruvoj, tiaj
faktoj jam sukcesis persvadi per si mem, sen fanfarona propagandado.

Valorigo de la marko-bildo ESPERANTO
------------------------------------

Iom  post  iom  kelkaj  lokaj  profesiuloj ekvidis, ke parolantoj plej
diverslandaj ekzistas kaj acxetas pro reklamado de tiu lingvo. Ekde la
kreo  de  TAKE (Tutmonda Asocio de Konstruistoj-Esperantistoj, organo:
la  gazeto  "La  Domo")  iel  uzis Esperanton vinkulturisto, miel- kaj
pomsukproduktisto,  agrikultura  kooperativo,  potfaristo,  restadejo-
kunvenejo,  artisto-  eldonisto kaj muzeo. Danke al tiu kunlaborado ni
havis  okazon  reklami  en la loka gazetaro, en radio kaj televido pri
tutsimplaj  faktoj:  la  veno  de esperantlingva klientaro el diversaj
landoj. La rezulto estas, ke de tiam absolute cxiuj artikoloj senditaj
de  TAKE  al  la  loka  gazetaro  estis presitaj. Tia reklamado pri la
turismaj  vidindajxoj, lokaj produktoj kaj entreprenoj, ankaux ebligis
al ni reklaman helpon de la komerca cxambro.

Uzado de ekonomia informoj por reklamado
----------------------------------------

Danke  al la traplukado de la loka gazetaro ni informigxis pri eventoj
sciindaj,   koncernantaj   plej   ofte   internaciajn  iniciatojn  aux
problemojn.  Tiam  -  je  la  nomo  de  TAKE - la redaktoro de La Domo
alskribas  la  koncernajn  instancojn  aux  firmaojn  por  peti pliajn
informojn.  Tre  multaj pozitive respondas kaj tutnature informas nin,
petante  ke  ni sendu ekzempleron de la revuo, se ni skribas artikolon
pri ili. La surskriboj sur nia leterpapero ebligas al ili malkovri per
TTT-pagxoj kaj minitel-adreso la lern- kaj uzeblojn de la lingvo. Tiel
la  kontaktitoj  vidas ke ni ekzistas, kaj ofte miras pri ilia antauxa
nescio.

Danke  al  la  reklamado - fare de nia prezidanto - al milo de import-
eksportaj  firmaoj en Elzaco antaux du jaroj, danke al la reklamanonco
en  la  bulteno  de  la  komerca  cxambro  de  Colmar  al  pli ol 3000
entreprenoj  kaj  al  nia kontaktmetodo koncernanta kelkajn centojn da
entreprenoj,   ni   ekzistigis   Esperan-  ton  en  nia  regiono,  sen
argumentado, nur per la fakto ke ni ekzistas kaj utilas per nia agado.

Cxu  vi  ne opinias, ke tia laboro - helpe de TAKE - en aliaj regionoj
kaj  landoj  ebligus  al la lokaj grupoj profiti de la prestigxo, kiun
donas tia agado al nia lingvo? Kontaktu nin!

Kia rolo por TAKE - La Domo interne de la movado?
-------------------------------------------------

TAKE  -  La  Domo  pretas publikigi cxiujn ajn artikolojn prifakajn de
samideanoj, praktikantaj profesion rilatantan al konstruado, riparado,
fabrikado de produktoj kaj disponigo de servoj. Ni antauxdankas cxiujn
samideanojn,   kiuj   havigas  al  ni  adresojn  de  tiaj  profesiuloj
esperantistaj.  Iom post iom TAKE - La domo pretas eldoni faklibretojn
kaj tiel kreskigi la diversfakan vortprovizon en Esperanto.

Cxu  la  kluboj,  asocioj,  E-instruistoj  akceptus  informi  la  plej
koncernatajn  profesiulojn  de  sia  klubo aux kurso pri la ekzisto de
TAKE - La domo?

Edmond Ludwig
26 route de la Schlucht, F-68140 Stosswihr, Francio.
http://www.worldnet.fr/mxjb/jefo


**********************************************************************


Nesurde spektu la spektaklon
============================

La  17-an  de  novembro en urbo Torun, Polio okazis inauxguro de unika
muzea  spektaklo  Esperantlingva, nomata LUMO kaj SONO pri la historio
de  la  urbo  Torun,  en  kiu naskigxis la fama pola astronomo Nikolao
Kopernik (1473).

La  spektaklo  -  unu el ok alilingvaj tiaspecaj - estas la rezulto de
pena  laboro  de  la  filio  de PEA kune kun Radio Torun. La inauxguro
okazis  kun  partopreno  de la estro kaj oficistoj de la Muzeo-Domo de
Kopernik, lokaj geesperantistoj kaj geamikoj.

Nun  cxiuj  E-grupoj  vizitantaj la urbon Torun havas la eblon vidi la
belegan  kaj  interesan spektaklon en Esperanto. La muzeo kore invitas
cxiujn.

E-Societo FLAMO, Pf. 16. PL-87100 Torun 1, Polio.

->  Rim:  Ne  ploris  -  agis!  Kiu  alia  muzeo  sekvos la modelon de
torunanoj?  La  kolumnoj  de Eventoj staras je la dispono por prezenti
ilin. La red.


**********************************************************************


La Kosmologio de Martinus
=========================

Esperanto-semajno
10-16. de auxgusto
1977 en Danio

La  kosmologio  montras,  ke  ekzistas psikaj naturlegxoj pri pensado.
Scio  pri  tio  ebligas  al la homo ekregi sian menson kaj future krei
mondregnon  surbaze  de  kosma  logiko  kaj  humanismo. Petu senkostan
brosxurojn kaj provekzempleron de la revuo

Kosmoscxe Martinus-Instituto,
Mariendalsvej 96, DK-2000 Kopenhago F, Danio.
Tel: +45-3834-6280
Fakso: +45-3834-6180

Neniaj unuigxo aux membreco


**********************************************************************


MOVADO
//////


Akademio: euro, graffiti kaj Alsace/Elsass
==========================================

Jara raporto de la sekcio pri Gxenerala Vortaro por 1996

Konforme al la nuna politiko en Akademio de Esperanto, celanta rapidan
disvastigon  de  informoj  pri  gxiaj  agadoj,  tiu  cxi raporto estis
preparita,  por  ke akademianoj, diversaj instancoj en Esperantujo, la
gazetaro  kaj  ankaux  la  gxenerala  publiko sciu pri la laboro de la
Sekcio pri Gxenerala Vortaro en 1966.

Konsisto de la sekcio
---------------------

Aligxis al la Sekcio pri Gxenerala Vortaro jenaj ok akademianoj: Perla
Ari-Martinelli,   Marjorie   Boulton,   Jorge   Camacho-Cordon,   Aldo
de'Giorgi, Reinhard Haupenthal, Christer Kiselman, Erich-Dieter Krause
kaj Li Shijun.

La unua enketo
--------------

Ekde  la  fino  de  majo  estis  sendita  la  unua enketilo de la nove
organizita  sekcio  kun  peto,  ke  la  sekcianoj decidu pri la gxusta
Esperantigo  de  (1)  la  monunuo  "euro",  (2)  la  italdevena  vorto
"graffiti" kaj (3) la toponimo "Alsace" (franca) / "Elsass" (germana).
La  enketiloj estis petitaj ne simple vocxdoni por preferataj terminoj
sed  pravigi  sian  elektojn  surbaze  de  etimologiaj  kaj  historiaj
donitajxoj kaj ankaux citado de auxtoritathavaj fontoj.

Resuma raporto
--------------

Cxiu  membro  de la sekcio partoprenis en la enketo, sendante detalajn
opiniojn  kaj komentojn. Mi resumis la enhavon de proks. 20 pagxoj kun
respondoj, en la formo de 11-pagxa raporto. Cxar mi ne povas preni sur
min  la  altan  koston  de  fotokopiado  kaj  afrankado,  mi petis, ke
prezidanto  Bormann okupigxu pri tio kaj enposxtigu po unu ekzempleron
al la 8 sekcianoj.

Demokrata pludiskutado
----------------------

Post  kiam  d-ro  Bormann  plenumos tiun taskon, sekcianoj havos eblon
trastudi  cxiujn  respondojn  kaj  dauxrigi la diskutadon en demokrata
maniero  por atingi finan decidon pri asimilado de "euro" , "graffiti"
kaj  "Alsace/Elsass". Tiam estos redaktita definitiva akademia raporto
kaj, eventuale, rezolucio.

Konkludo
--------

La  Sekcio  pri  Gxenerala  Vortaro ne havas rilaton kun la lastatempe
organizita   akademia   "fajrobrigado",   kiu  celas  impeti  kontraux
problemojn   kaj   rapide  trovi  solvojn.  Male,  neniel  obsedas  la
sekcidirektoron  iu ajn dilemo pri rapideco kaj zorgeco. Liaopinie, la
sola  prudenta  kaj celkonscia maniero atingi utilajn kaj longdauxrajn
rezultojn  estas per sobra kaj cxiuflanka pripensado de cxiuj aspektoj
de la leksikaj demandoj prezentitaj al la sekcio.

Decembro, 1996.

Bernard Golden,
direktoro de la Sekcio pri Gxenerala Vortaro


**********************************************************************


94 = 15.01 %
============

La  nombro  de  euxroparlamentanoj en decembro kreskis al 94 personoj,
kiu signifas 15 %-on de la tuta parlamentanaro.

Fragmentoj el la cirkulero de la kunordiganto G. Pirlot:

"...Lauxeble  ni  dauxrigu  nian  inform-kampanjon cxe EP-anoj, ecx se
kelkaj  vocxoj  kontrauxas  nian  agadon.  Pri tio ni fajfu!. Laux mi,
estas  preferinde  aktive,  objektive informi EP-anojn, ol palavri dum
monatoj   dum   jaroj   pri   ideala   laborplano,  kiun  poste  neniu
konkretigos...

...Evidentas  ankaux,  ke sendado de revuoj, bultenoj ne efikas. Se io
interesa  aperas  en  bulteno,  ni  ne sendu la tutan numeron, sed nur
fotokopion de la leginda pagxo, atentigante pri la plej gravaj frazoj.
Neniam   ni   forgesu,   ke   EP-ano  ricevas  plurdekojn  de  leteroj
cxiutage..."

La  agado  ne  devas limigxi nur al la jamaj euxroparlamentanoj. Indas
kontakti,  informi  la deputitojn de via nacia parlamento, des pli, se
via lando estas kandidatigxinta al EU.

Demandu  vian  landan  asocion pri vialanda kunordiganto. Kiu faros la
laboron - se ne vi?

R. M.


**********************************************************************


3 novaj membroj!
================

SAT  havas  cxirkaux 90 membrojn en Japanio kaj cxirkaux 30 en Cxinio.
En la auxgusta Azia Kongreso en Sanghaj ni havis propran kunsidon. Tie
cxeestis  14  SAT-gekamaradoj  (kaj  13  interesigxantoj), kaj post la
kunsido tri esprimis deziron aligxi al la asocio.

...  Estas  interese,  sed  bedauxrinde, ke gxis nun parto de la mondo
ankoraux  miskonsideras SAT (Sennacieca Asocio Tutmonda) kiel dangxera
asocio.  En  Koreio  oni  suspektis,  ke  SAT  kvazaux estas komunisma
asocio,  dum en Cxinio oni suspektis kaj kelkaj ankoraux suspektas, ke
SAT  estas  kontrauxsocialisma.  Jes,  SAT  estas  tiel dangxera, kiel
Esperanto  estas  "dangxera lingvo". La fakto estas tio, ke diktatoroj
kaj  auxtoritatismaj  registaroj  cxiam  timas  liberajn opiniadon kaj
kritikadon, kiuj karakterizas nian asocion. Cxu SAT do povos fari bone
en Cxinio? Espereble jes, almenaux gxis proksima estonteco (kiu scias,
kio okazos en malproksima estonteco?)...

el Sennaciulo, dec/96


**********************************************************************


Zamenhoftago en Albanio
========================

La  13-an  de decembro la nacia televido arangxis intervjuon kun prof.
Bardhyl Mezini. Dimancxe, la 15-an samon faris radio.

Tirana E-Societo arigxis cxe la domo de Fakultato de naturaj sciencoj.
La cxeestintoj auxskultis rakonton pri la vivo de Zamenhof kaj spertis
video-filmon pri E-movade enmonde.

Bardhyl Mezini


**********************************************************************


Desegnajxoj kaj naskigxtagoj
============================

Al  la  alvoko  de  KEU  (Kroata  Esperantista  Unuigxo)  pri  jarfina
ekspozicio  de  infandesegnajxoj  alvenis  pli  ol  300 kontribuoj. La
sesdek  plej  bonaj  estis  eskpoziciataj  en Zagrebo dum la Zamenhof-
festo de KEU.

KEU   krom   la  Zamenhofa  naskigxtago  festis  ankaux  sian  5-jaran
naskigxtagon (gxi estas fondita la 14-an de decembro 1991).

Marija Belosxevicx
mbelosev@forigu.public.srce.hr


**********************************************************************


Senkosta telefonnumero
======================

En pluraj landoj ekzistas ebleco funkciigi "senkostan telefonnumeron",
per  kiu  oni  senkoste  povas  telefoni  al  iu  firmao aux E-asocio.
(Kompreneble  la  telefonado  estas  senkosta  nur  por la vokanto, la
realajn  kostojn al la telefona kompanio pagas la servo- luanta firmao
mem).  La  servo  estas  tre  utila,  ja  gxi instigas homojn sengxene
telefoni,  peti  informojn,  -  kaj  utilas  ankaux  por la firmao (E-
asocio), cxar tiel gxi pli facile kaptas novajn klientojn.

Esperanto-Ligo  de Norda Ameriko, ELNA ne nur jam antauxlonge utiligas
tiun  eblecon,  sed (danke al Ed Williger kaj Steve Belant) nun akiris
bone memoreblan simplan telefonnumeron:

        800-ESPERANTO
        800-3773726

La cifero 800 estas la prefikso por la "senpagaj" vokoj, kaj la numero
3773726  respondas  al  la  literoj, trovigxantaj sur la butonoj de la
telefonaparato.  Oni  povas,  sed  ne  nepre devas premi la respondajn
kromajn ciferojn de T kaj O, tio ne gxenas la gxustan funkciadon.

Tiu  numero  funkcias  nur  Usone. Cxe telefonado, al la informpetanto
respondas auxtomato kaj en la fino petas lasi la nomon kaj adreson, al
kio ELNA sendas brosxurojn pri Esperanto kaj kvar novajxleteron dum la
sekvaj dekdu monatoj.

Por  la  vokoj  ELNA pagas po cx. 32 cendojn - do la saman sumon de la
posxte  pagendan  por  enlanda  letero.  Kutime  alvenas cx. 15 vokojn
semajne,  sed post apero de ajna favora artikolo inundas vokoj dum iom
da tempo.

La   nova   numero   estas  publikigata  (-enda)  en  cxiuj  varbiloj,
informiloj.

laux inf. de ELNA


**********************************************************************


BAZAJ INFORMOJ
//////////////


UEA-Premio Onisaburo Deguchi
============================

La  premio  Deguchi ekzistas ekde la Jubilea Jaro 1987, kiam gxi estis
unuafoje    aljugxita.   Gxi   celas   distingi   esperantistojn   aux
esperantistan  organizojn,  kiuj pere de Esperanto grave kontribuis al
la plifortigo de internacia amikeco kaj solidareco.

Listo de gxisnunaj premiitoj:

          1987 - Hans Bakker, Nederlando
          1988 - Ralph Harry, Auxstralio
          1989 - Internacia Klutura Servo, Kroatio
          1990 - Jacques Tuinder, Nederlando
          1991 - Sylla Chaves, Brazilio
          1992 - Bruno Vogelmann, Germanio
          1993 - E-redakcio de Pola Radio
          1994 - Calude Piron, Svisio
          1995 - William Auld, Britio
          1996 - Dimitar Terziev, Bulgario


**********************************************************************


Atasxea kontribuo
=================

La  Zamenhof-vespero, okazigita la 6-an de decembro 1996, rezultis ecx
pli  sukcesa  ol  en  antauxaj jaroj, kaj ne nur pro la eksterordinara
partopreno de samideanoj.

Invitite  de  la  Venezuela  Esperanto-Asocio, partoprenis ankaux S-ro
Slawomir  Kulesza, kultura atasxeo de la Ambasado de Polio en Karakas.
Ne  hazarde  mi  diris  "partoprenis"  kaj  ne "cxeestis"; fakte, S-ro
Kulesza   ne  nur  pasive  cxeestis  nian  jaran  eventon,  sed  vigle
kontribuis  al  la estigo de pli agrabla etoso, per hispana paroladeto
pri Zamenhof, inkluzive memorante sian junagxan esperantistecon.

inf: Andres Turrisi
andesp@forigu.internet.ve


**********************************************************************


Kial fusxi la nomon?
====================

Vortoj servas por identigi iun nocion por komuna kompreno. Esprimi iun
nocion  tamen  ne  cxiam estas simpla, kaj aparte gravas la komunforma
uzo  en  Esperantio,  kie  krom la nacilingvaj baroj, kutimoj ni devas
venki ankaux la diversecon de kulturoj.

La  organizo  Monda  Turismo,  MT  jam  la  7-an  fojon  organizas iun
arangxon,  kion  insiste  gxi  nomas  "Internacia Esperanto-Kongreso".
Renkontante la esprimon jaro-post-jaro mi meditadas, kies kongreso gxi
estas?  Cxu  tio  de  MT? Ne, gxi havas propran forumon. Cxu tio de la
akceptanta  lando?  Ne  oni havas propran. Cxu tio de la loka organiza
turisma firmao? Certe ne.

Mi  tre  gxojus,  se  oni  ne miskreditigus la esprimon de "Internacia
Esperanto-Kongreso",  sed  uzus  ion  alian,  ja  MT ne estas la cxefa
organiza  forto  por  la  internacia  E-movado.  Esperanto  estas  tre
esprimricxa  lingvo.  Kial  ne  uzi  festivalo,  ferisemajno, kunveno,
renkontigxo,  umado,  ripoz-semajno  aux  simple  semajno, somerumado,
karnavalo, turismumado ktp?

La  vorton  "kongreso"  ni  prefere  ne  miskreditigu. Kaj cxefe ne la
esprimon: Internacia Esperanto-Kongreso.

Laszlo Szilvasi


**********************************************************************


REVUOJ, GAZETOJ
///////////////


Esperantolehti en novaj manoj
=============================

Esperantolehti,  organo  de Esperanto-Asocio de Finnlando, havas novan
redaktoron kaj adreson ekde januaro.

La  nova  redaktoro  estas  Aimo  Rantanen  kaj lia adreso estas PL 2,
FI-40801 Vaajakoski, Finnlando.

La e-posxta adreso restas la nuna: tijupie@forigu.uta.fi

                             * * *

Kangurue
========

Ekde  januaro  la  redaktadon  de  l'alpa kanguruo, la komuna revuo de
svisa  kaj  auxstra  E-Junularo de Rolfo transprenas Pedro Pablo Munoz
Predas   (Gentzgasse   129/2/51,   A-1180   Vieno,   Auxstrio,   rete:
pepablo@forigu.pap.univie.ac.at).


**********************************************************************


ALVOKO
//////


2000 dolara premio kaj aliaj...
===============================

Dumil dolara literatura premio
------------------------------

Nova  literatura  premio  en  Esperanto "Francisco Manez" naskigxas en
Cheste  (Valencio,  Hispanio).  La  unua  kaj sola premio konsistos el
2.000  usonaj  dolaroj.  Gxi  estos  transdonita  al  la  gajninto  en
Valencia,    okaze    de   la   7-a   Internacia   Esperanto-Kongreso.
Interesigxantoj  petu  la  regularon  de: Sociedad Cultural Ateneo "La
Alianza". Plaza Doctor Cajal 11. ES-46380 Cheste (Valencia), Hispanio.

Kurso de Esperanto en la Universitato de Valencio
-------------------------------------------------

Por la dua fojo ene de la sama jaro, pro la sukceso de la unua, okazos
kurso de Esperanto en la Fakultato pri Filologio de la Universitato de
Valencio (Hispanio). La akademia valoro de la diplomo dauxre restas je
du kreditoj. La profesoro denove estos Augusto Casquero.

7-a Internacia E-Kongreso, kaj 7-a Euxropa Esperanto-Forumo
-----------------------------------------------------------

Ili  okazos  en Valencio (Hispanio), inter la 8-a kaj la 13-a de julio
1997. Konstanta adreso: Grupo Esperanto de Valencio, Gran Via Fernando
el   Catolico,   45,   3-a,  ES-46008  Valencia  (Hispanio).  Telefono
+34-6-3401369, fakso +34-6-3849616

7-a kongreso de Valencia E-Federacio
------------------------------------

Okazos en Benidorm (Hispanio), 19-20 de aprilo 1997. Konstanta adreso:
Jose  Miguel  Bernabeu Egea. Plaza Pio XII, 1, 4a-C, ES-03012 Alicante
(Hispanio).

Se  vi  deziras  havi  konstantajn  informojn  pri  la  7-a Internacia
Esperanto-Kongreso, vi povas legi nian pagxon:

http://www.redestb.es/personal/a-casquero/
Augusto Casquero
a-casquero@forigu.redestb.es


**********************************************************************


KONKURSO
////////


Internacia poentokolekta konkurso
=================================

La konkurso okazas en organizaj kadroj de internacia lerneja konkurso.
Taskfolioj  por  lernejanoj  estas  haveblaj  aparte.  Vi povasresendi
solvojn  ecx  se  vi  respondas  nur al kelkaj demandoj, kaj ecx se vi
partoprenas ne de la komenco de la jaro!

5-a taskofolio
--------------

1. Kolektu   almenaux  ses  kunmetitajn  vortojn,  en  kiuj  trovigxas
   tabl(o). (3 poentoj)

2. Klarigu, kion signifas: monerigi (3 poentoj)

3. Kio estas la diferenco inter vojo kaj strato? (3 poentoj)

4. En  kiu  poemo  trovigxas  la  sekva  verso  (titolo kaj poeto): (2
   poentoj)

   "Nur rekte, kuragxe kaj ne flankigxante"

5. Kompletigu: En ... malbono ... ... da bono. (3 poentoj)

6. En kiuj landoj oni okazigis jam po ses UK de Esperanto? (2 poentoj)

                     U
7. Solvu la enigmon: - (2 poentoj)
                     L

8. Kiam naskigxis Hilda Dresen, la fama verkistino? Kiu sxi estis laux
   nacieco? (2 poentoj)

La  solvojn  sendu  gxis  10-a de februaro al: Gimnazio Kossuth Lajos,
Esperanto-Grupo, Dayka G. u. 4, HU-3525 Miskolc, Hungario


**********************************************************************


INSTRUADO KAJ ILEI
//////////////////


Legu kaj desegnu MAZI-on
========================

Cxe  Internacia  Esperanto-Instituto eblas mendi diversajn librojn pri
MAZI, kompletigantaj la videofilmon.

1. La  unua  (flava)  MAZI-libro  estas tiu, kiu apartenas al la unuaj
   venditaj  MAZI-kompletoj.  Cxi estas kun eraroj (pro tio ni aldonis
   erarlistan folion), kaj kostas 12 NLG.

2. La  dua  (rugxa)  MAZI-libro  estas  tiu,  kiu  apartenas al la nun
   vendataj kompletoj. Gxi estas SEN erara, kaj kostas 18 NLG.

3. Kolora libro kun ekzercoj (subtitolo "Aktiviga libro"), kun
   eraroj, kostas 18 NLG.

4. Parte  jam  korektita  sama  libro  (nun kun subtitolo "Ekzercu kaj
   ludu"), kun erarlisto sur flava folio, gxi kostas 23.5 NLG.

Rabato  gxis  10  ekzempleroj: 20 %, por pli granda kvanto: 30 %. Kiel
cxiam, aldonigxas la sendokostoj. UEA-kodo: iein-q. Kontaktu:

IEI, Riouwstraat 178, NL 2585 HW Den Haag, Nederlando.
Rete: espero@forigu.saluton.iaf.nl


**********************************************************************


                Bonvolu noti la novan adreson de

                             PROSPERO
                             ========
                         Zinovi Kurolap

1881 Steeles Avenue West, #216 North York, Ontario, M3H 5Y4, Kanado
           Tel.: +1-416-6505277 (10.00-20.00 h de loka tempo)
                     Fakso: +1-416-6507102 (24h)
                 Retposxto: prospero@forigu.globalserve.net


**********************************************************************


KORESPONDI DEZIRAS
//////////////////


Studentino, 20-jara: Iwona Wilmanowicz, ul. Ciechocinska 14, PL-87124
Zlotoria, Polio.

                             * * *

26-jara  irana  studento  sercxas  korespondantojn  dise  en la mondo.
Respondo garantiata. Babak Rasoulian, POBox 165, Borujerd, Irano

                             * * *

Studentino,  20-jara:  Lucyna Muszynska, ul. Warszawska 30,a,8, PL-14-
260 Lubawa, Polio.

                             * * *

Studentino  23-jara:  Katarzyna  Krepec,  ul.  Jaranowo  4,  PL-87-704
Badkowo, Polio

                             * * *

Lernantino  17-jara,  Joanna  Kletkiewicz,  Bobrowniki  n. Wisla, woj.
wloclawskie, Polio.

                             * * *
Lernanto  16-jara:  Cezary  Kletkiewicz,  Bobrowniki  n.  Wisla,  woj.
wloclawskie, Polio.

                             * * *

Mi  estas  komencanta  esperantisto.  Min interesas turismo, historio,
ekologio.  Mia  agxo estas 18. Mi volas korespondi kun persono el alia
lando. Piotr Warda, PL-08110 Siedlce, ul. Lelwela 18, Polio.

                             * * *

Grupo de geknaboj dez. kor. Kolektas bildojn de floroj, kalendaretojn,
posxtmarkojn.  Skribu al: Pedan Nikolaj, s. Suslovka, Dnepropetrovskij
rajon, Ukrainio.

                             * * *

38-j.  dez. kor. tm. Interesoj: E-movado, NIFO-j, turismo, montaro. Mi
kolektas  telefonajn  magnetajn  kaj cxip-kartojn, esperantajxojn, bk.
Robert Kaminski, ul. Kwiatowa 1, PL-94-227 Lodz, Polio.

                             * * *

13-jara knabino dez. kor. kun samagxuloj. Interesoj: vojagxoj, sporto,
granda   teniso,   bestoj,   la   naturo...   Renata   Sxarofutdinova,
Akademgorodok 21-34, RUS-660036 Krasnojars, Rusio.

                             * * *

Mi   dez.  kor.  kun  esperantistoj  el  t.m.  Mi  estas  40-j.  viro,
interesigxas pri turismo, landoj, libroj. Antanas Visockas, Ab/d. 295,
LT-3000 Kaunas, Litovio.

                             * * *

Mi  nomigxas  Marcelo  kaj  mi tre sxatus ekkoni amikojn en via lando.
Marcelo Martins el Rio de Janeiro: martins@forigu.mail.rio.com.br

                             * * *

"Mi   volas   korespondi   tutmonde  pri  cxiuj  temoj,  speciale  pri
socisciencoj,  kulturo  kaj  matematiko. Frauxlo, 19-jaragxa, studento
pri juro. Smikov Ilja, ul. Ostrovskogo 5 -86, Kislovodsk, RUS-357739


**********************************************************************


INTERESE
////////


"Vi baldaux kaptos la ideon...!"
================================

La  jxurnalo  Svenska  Dageblatt  rivelis lastatempe interesan fakton.
Preskaux  la  duono  de  la  verkistoj  kiuj  debutis en Svedio dum la
pasinta  jaro partoprenis kursojn pri verkado. Mi diras "rivelis" cxar
la verkistoj mem malvolonte konfesas tion. Evidente ili rigardas tiajn
kursojn  kiel  iel  maldignaj.  Svenska Dageblatt komentis tiun fakton
rilate  al  anonco  pri  nova  dujara  kurso por verkantoj kiu baldaux
komencigxos  cxe  la  Universitato  de  Gotenburg.  La  verkoj  de  la
studentoj  estos  kritikitaj  de  grupo de "kvalifikitaj verkistoj kaj
kritikistoj".  Aspirantoj  kiuj  ne  hontas  ricevi lertan gvidadon de
kvalifikitaj verkistoj kaj kritikistoj jam abundas. Sed, imagu...

"Ah,  Sinjoro  Tolstoj.  Bonvolu  sidigxi.  Ni  legis  parton  de  via
manuskripto  "Milito  kaj  Paco".  Gxi ne estas tute senmerita. Sed vi
certe  bonvenigos iom da rekta kritiko, cxu ne? Nu... la leganto devas
tralegi  150 pagxojn antaux ol komencigxas la unua batalo. Mi certigas
al  vi, ke tiu leganto ne legos pli ol ses pagxojn. La leganto sercxas
mortigan  rapidecon  kaj  sencxesan  agadon. Forstreku la pagxojn de 1
gxis 140! Minimumigu la konversaciojn! Mi proponas forprenon de pagxoj
160  gxis  740. Koncentru la atenton je la batalscenoj! Paroladoj, ecx
spritaj,  (kaj  viaj ne estas spritaj), simple tedas la leganton... La
Epilogo  estas  nur  eseo  pri  morala  filozofio.  Neniu  legos tion.
Forstreku  gxin! Kaj la longo! 1400 pagxoj! -Reduktu gxin al ne pli ol
150  pagxoj!  Pri  la  personaro...  En la momento vi havas 30 cxefajn
personojn  kaj  mi  ne  scias  kiom  da aliaj. Celu al nur kvar cxefaj
personoj!  Estu  konciza. Enkonduku triangulan amintrigon! Vi evidente
posedas  fantazikapablon  sed  vi devas disciplini gxin. En la momento
viaj ideoj forkuras cxiudirekten. Reviziu la verkon laux miaj proponoj
kaj  poste  ni  provu  transformi  la verkon en muzikan dramon laux la
usona modelo, kiel "South Pacific", aux "Annie Get Your Gun". Provu...
vi baldaux kaptos la ideon..."

Ah,  Jane... pri via manuskripto "Fiero kaj Antauxjugxo". Jes vi havas
kelkajn  ideojn  el  kiuj oni eble povus fari ion, sed unue mi informu
vin  pri  baza principo en la nuntempa verkado. Neniam utiligu vortojn
kiuj  konsistas  el  pli  ol du silaboj! Aparte je titoloj: "Fiero kaj
Antauxjugxo"  -  tri  silaboj,  kvar  silaboj.  La  nuna  legantaro ne
kapablas  tiajn vortojn. Kaj "Antauxjugxo" -malfacila vorto. Studentoj
ne  atingos  tiun  vorton  gxis  la fina jaro en universitato - kaj la
plejmulto  ecx  tiam  ne  lernis gxin. Vi perdos legontojn pro la nura
titolo... Kaj pri la rilato inter Elizabeth kaj Mr Darcy. Laux vi, tio
estas nur cxiutaga am-rilato inter du neparencaj personoj. Tio tute ne
tauxgas hodiaux. Lernu de Jackie Collins! Enmetu fivortojn, blasfemojn
kaj  priskribojn  de  erotikajxoj...  Aux  ecx pli bone ordigu aferojn
tiel,  ke  Elizabeth  kaj  Mr  Darcy  estu gefratoj. Tiel vi havos kaj
erotikajxojn kaj inceston samtempe. Incesto estas moda cxi jare. Kaptu
la  okazon!  Kaj  la nomoj... Elizabeth kaj Mr Darcy! Tiuj ne tauxgos.
Sxangxu  tiujn al Sandra kaj Clint. Mi donu al vi alian konsilon. Laux
la   'Times   Literary  Supplement'  ni  kalkulas,  ke  venontjare  la
nekrofilio  estos  la modo. Pripensu tion! Se vi komencas nun, vi eble
havos ion pretan por la Kristnaska periodo".

"Ah jes, Mr. Dostojevski. Ni legis vian manuskripton "Krimo kaj Puno".
Kiel  studenta  laboro  gxi  ne  estas  malbona. Sed vi faras la saman
eraron  kiel  aliaj  studentoj.  Tro  multe da vortoj. La sceno en kiu
Raskolnikov  mortigas la du virinojn per hakilo estas promesoplena. Mi
gratulas  vin. Sed tiu estas la sola perfortajxo en la tuta verko! Cxu
vi ankoraux ne konas la verkojn de Raymond Chandler kaj James M. Cain?
Studu  tiujn  verkistojn...  Forstreku  la  historion  pri  Sonia  kiu
persvadas  Raskolnikov-on  konfesi kaj penti. Kion vi diras? Tiu parto
estas  la  kerno  de la verko? Forgesu tion! Hodiaux neniu pentas. Tio
estas  eksmoda.  Eksmoda. La sento de kulpo delonge malaperis de inter
ni.  Duonigu la verkon! Forstreku la filozifajn kaj religiajn partojn.
Usonigu la persono-nomojn kaj la loknomojn, kaj aldonu tri aux kvar de
tiuj  hakilmurdoj... Aux ecx... kial ne?... reordigu la intrigon tiel,
ke  gxi  estu  konfeso de serio- murdisto en la estonteco... kiel Star
Trek... mi havas amikon cxe la BBC, eble ni povus ellabori ion kune...

Harold Brown
el "Bulteno de Londona E-Klubo" sep-okt/1996


**********************************************************************


MOVADA HUMURO
/////////////


Sekreta plagiato
================

Edzino  legas  la  "Sekretajn  Sonetojn".  Subite sxi turnigxas al sia
edzo:

- Johano,  imagu, tiu Peter Peneter kuragxis enmeti ankaux la soneton,
  kion vi skribis al mi antaux du jaroj!..

                             * * *

Ne mi frenezigxis
=================

- Mia  patro  frenezigxis,  kaj mi anstatauxas lin en la libroservo de
  nia asocio.

- Do, vi vendos al mi kredite la libron...

- Sed vi miskomprenis min. Frenezigxis mia patro, ne mi...


**********************************************************************

EVENTOJ, Nyt. sz.: B/TSZL/85/1991. ISSN 01215-959 X
===================================================

A kiado es a szerkesztoseg cime:
H-1675 Budapest, pf. 87.
Tel./fax: 282-88-85. Internet: eventoj@forigu.hungary.net
Megjelenik kethetente.
Nyomas: SZELKER Bt. H-1149 Bp, Fogarasi u. 17/A
EVENTOJ, dusemajna gazeto pri la esperanto-movado.
Eldonas LINGVO-Studio kaj Kultura Esperanto-Asocio.
Respondeca eldonanto kaj cxefredaktoro: Laszlo Szilvasi.
Oficejaj kunlaborantoj: Istvan Meszaros, Zsuzsanna Virag, Laszlo Vizi
La redakcio ne nepre konsentas pri la enhavo de unuopaj artikoloj,
kaj ne respondecas pri la anonc-enhavoj.
Abonkotizo: 74 nlg (aere 86 nlg) al la UEA-kodo ells-s.

**********************************************************************

FINO